МИБ Наманган вилоят бошқармаси томонидан ўтказилган тадбир давомида масъулияти чекланган жамиятлардан бирига қарашли автомобиль солиқ қарздорлиги эвазига хатланди. Бу ҳақда “Дарё” мухбири Азизбек Абдувалиев хабар бермоқда.
Вилоят солиқ бошқармаси қарорига кўра мазкур жамиятдан жами 730,6 миллион сўм солиқ қарздорлиги ундириш белгиланганди. Мазкур ҳужжат бюронинг Янги Наманган тумани бўлими иш юритувига олинган ва қарздор жамиятга солиқ мажбуриятини бажариши учун ихтиёрий муддат берилганди. Бироқ жамият мутасаддилари қарздорликни бартараф этмаган.
Шундан сўнг мажбурий ижро ҳаракатлари олиб борилган ва 447,9 миллион сўм ундирилиб, қарздорлик учун йўналтирилган. Қолган сумма тўланмаганлиги сабабли Trailblazer русумли автомобиль хатланиб, жарима майдонига тортилди.
Маълумот учун, жорий йил 10 ой давомида МИБ томонидан солиқ қарздорлигини ундириш билан боғлиқ 1 триллион сўмдан ортиқ ижро ҳужжатлари тамомланди, шундан 500 миллиард сўми амалда ундирилди. Ижро ҳаракатлари давомида 127,4 миллиард сўмлик мулклар хатланиб, 72 миллиард сўмлиги аукцион савдоларига чиқарилди.
Изоҳ (0)