Toshkentda 7 yoshli qizga ko‘p qavatli uy podyezdida tegajog‘lik qilgan erkak qo‘lga olindi, deb xabar beradi “Sukut saqlama” loyihasi.
Ma’lum qilinishicha, 8-iyun kuni soat 17:00 da Mirzo Ulug‘bek tumanida (Musavvirlar bekati) o‘rta yoshdagi begona erkak 7 yashar qiz orqasidan podyezdga kirgan. O‘sha uyda yashaydigan qiz 1-qavatda turadigan dugonasining oldiga kelgan.
Erkak qizni qo‘rqitib, ro‘paradagi eshik oldiga olib borib, qizni o‘pib, intim joylarini ushlagani va boshqa uyatsiz xatti-harakatlar qilgani aytilmoqda. Qizning dugonasi uning kelavermaganidan xavotir olib, o‘zi ko‘chaga chiqqanida erkak hodisa joyidan qochib ketgan. Jabrlanuvchining ota-onasi holat bo‘yicha darhol ichki ishlar organlariga murojaat qilgan.
Aniqlanishicha, ushbu shaxs Qibray tumanida istiqomat qiluvchi 1968-yilda tug‘ilgan oilali erkak bo‘lib chiqqan.
“Kecha tergovchi Jinoyat kodeksi 129-moddaning 3-qismi (shaxsning o‘n olti yoshga to‘lmaganligi aybdorga ayon bo‘lgan holda, unga nisbatan zo‘rlik ishlatmay uyatsiz-buzuq harakatlar sodir etish) bilan jinoiy ish qo‘zg‘atmoqchi edi. Unga ko‘ra 5 yildan 8 yilgacha qamoq jazosi beriladi”, — deyiladi xabarda.
“Sukut saqlama” mualliflari videoda 119-modda 4-qismiga (zo‘rlik ishlatib, qo‘rqitib yoki jabrlanuvchining ojizligidan foydalanib, jinsiy ehtiyojni g‘ayritabiiy usulda qondirish) muvofiq jinoyatning to‘liq tarkibi aks etgan, deya hisoblaydi. Mazkur modda 15 yildan 20 yilgacha qamoq jazosini nazarda tutadi.
Bundan oldin Toshkent viloyati Yangiyo‘l tumanida yashovchi 19 yoshli yigit 10 kun davomida voyaga yetmagan qizni bo‘sh uyda saqlab, uni o‘zi bilan jinsiy aloqa qilishga majburlab kelgani ma’lum bo‘lgandi. Yigit butun jarayonni videotasvirga olgan va keyinroq qizni o‘zi bilan yana yotishi uchun shantaj qilib kelgan.
Shuningdek, Toshkentda qizlar yotoqxonasi qarshisida axloqsiz harakatlarni sodir etgan erkakka chora ko‘rilgani, Qashqadaryoda o‘g‘il bola jiyanini zo‘rlagan erkakka hukm o‘qilgani to‘g‘risida xabar berilgandi.
Izoh (0)