Bugun, 24-noyabr kuni Toshkent shahri Ichki ishlar vazirligi Jamoat xavfsizligi departamenti Yo‘l harakati xavfsizligi xizmati bilan hamkorlikda Toshkent shahri Chilonzor tumanida yo‘llardagi harakat xavfsizligini kuchaytirish, piyodalar qoidabuzarliklarini kamaytirish maqsadida reyd tadbiri o‘tkazildi.
Toshkent shahar IIBB axborot xizmati boshlig‘i Qahramon Xudoyberganov ushbu reyd poytaxt hududida yo‘l harakati xavfsizligini taʼminlash maqsadida amalga oshirilayotganini taʼkidlab o‘tdi.
“Joriy yilning 5-avgust kuni Toshkent shahar prokuraturasi, Ichki ishlar bosh boshqarmasi va Toshkent shahar hokimiyati tomonidan qo‘shma farmoyish imzolangan bo‘lib, ushbu farmoyishda bir qator chora-tadbirlar yuzasidan topshiriqlar berilgan. Hozirgi kunda qo‘shma farmoyish ijrosini taʼminlash yuzasidan YPX xodimlari tomonidan xizmat tashkil etildi.
Toshkent shahri hududida so‘nggi vaqtlarda piyodalar bilan bog‘liq yo‘l transport hodisasi ko‘p sodir bo‘lmoqda. Hozirgi kunda YPX xodimlari haydovchi va piyodalarga yo‘riqnomalar berib, qoidani buzgan ayrim haydovchi va piyodalarga maʼmuriy bayonnoma rasmiylashtirmoqda.
Bizning asosiy maqsadimiz poytaxt hududida yo‘l harakati xavfsizligini taʼminlash va yo‘l transport hodisalarining oldini olish”, – deydi podpolkovnik Xudoyberganov.
Maʼlumot uchun, 2023-yilning 9 oyi davomida poytaxtda piyodalar bilan bog‘liq 539 ta YTH sodir etilgan bo‘lib, unda 566 nafar piyoda tan jarohati olgan. Ularning aksariyati piyodalar belgilanmagan joylardan va svetoforning taqiqlangan chirog‘ida o‘tish paytida sodir etilgan.
Maʼmuriy javobgarlik to‘g‘risidagi kodeksning 138-moddasiga ko‘ra, piyodalar o‘tish joyida harakatlanayotganda telefondan foydalanishi, kitob yoki davriy nashrlarni o‘qishi, videomaterial tomosha qilishi hamda audiomaterial eshitishi, shuningdek, eʼtiborni chalg‘itadigan boshqa elektron vositalardan foydalanishi BHMning uchdan bir qismi (110 ming so‘m) miqdorida jarima solishga sabab bo‘ladi.
Piyodalarning yo‘lning harakat qismini belgilanmagan joylardan kesib o‘tishi ham shuncha miqdorda jarima solishga sabab bo‘ladi.
Izoh (0)