Бугун, 24 ноябрь куни Тошкент шаҳри Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати билан ҳамкорликда Тошкент шаҳри Чилонзор туманида йўллардаги ҳаракат хавфсизлигини кучайтириш, пиёдалар қоидабузарликларини камайтириш мақсадида рейд тадбири ўтказилди.
Тошкент шаҳар ИИББ ахборот хизмати бошлиғи Қаҳрамон Худойберганов ушбу рейд пойтахт ҳудудида йўл ҳаракати хавфсизлигини таъминлаш мақсадида амалга оширилаётганини таъкидлаб ўтди.
“Жорий йилнинг 5 август куни Тошкент шаҳар прокуратураси, Ички ишлар бош бошқармаси ва Тошкент шаҳар ҳокимияти томонидан қўшма фармойиш имзоланган бўлиб, ушбу фармойишда бир қатор чора-тадбирлар юзасидан топшириқлар берилган. Ҳозирги кунда қўшма фармойиш ижросини таъминлаш юзасидан ЙПХ ходимлари томонидан хизмат ташкил этилди.
Тошкент шаҳри ҳудудида сўнгги вақтларда пиёдалар билан боғлиқ йўл транспорт ҳодисаси кўп содир бўлмоқда. Ҳозирги кунда ЙПХ ходимлари ҳайдовчи ва пиёдаларга йўриқномалар бериб, қоидани бузган айрим ҳайдовчи ва пиёдаларга маъмурий баённома расмийлаштирмоқда.
Бизнинг асосий мақсадимиз пойтахт ҳудудида йўл ҳаракати хавфсизлигини таъминлаш ва йўл транспорт ҳодисаларининг олдини олиш”, – дейди подполковник Худойберганов.
Маълумот учун, 2023 йилнинг 9 ойи давомида пойтахтда пиёдалар билан боғлиқ 539 та ЙТҲ содир этилган бўлиб, унда 566 нафар пиёда тан жароҳати олган. Уларнинг аксарияти пиёдалар белгиланмаган жойлардан ва светофорнинг тақиқланган чироғида ўтиш пайтида содир этилган.
Маъмурий жавобгарлик тўғрисидаги кодекснинг 138-моддасига кўра, пиёдалар ўтиш жойида ҳаракатланаётганда телефондан фойдаланиши, китоб ёки даврий нашрларни ўқиши, видеоматериал томоша қилиши ҳамда аудиоматериал эшитиши, шунингдек, эътиборни чалғитадиган бошқа электрон воситалардан фойдаланиши БҲМнинг учдан бир қисми (110 минг сўм) миқдорида жарима солишга сабаб бўлади.
Пиёдаларнинг йўлнинг ҳаракат қисмини белгиланмаган жойлардан кесиб ўтиши ҳам шунча миқдорда жарима солишга сабаб бўлади.
Изоҳ (0)