“Ey vijdonsiz, davlatga nisbatan xalq nafratini qo‘zg‘ayapsan, norozilik kayfiyatini kuchaytiryapsan”. Erkinjon Turdimov mansabdorlarni tanqid qildi (video)

Samarqand viloyati hokimligida o‘tkazilgan faollar yig‘ilishida “Obod qishloq” va “Obod mahalla” davlat dasturlari ijrosiga sovuqqonlik qilayotgan mansabdorlarni javobgarlikka tortish haqida so‘z bordi. Bu haqda “Daryo” muxbiri Farhod Norbo‘tayev xabar bermoqda.

Ma’lum bo‘lishicha, bugun, 20-sentabr kuni viloyat hokimligida Erkinjon Turdimov rahbarligida faollar yig‘ilishi o‘tkazilgan. Unda viloyat hokimligi ishchi guruhi tomonidan olib borilgan o‘rganishlar natijasiga ko‘ra, “Obod qishloq” va “Obod mahalla” davlat dasturlari ijrosi muhokama qilingan.

Xususan, Ishtixon, Qo‘shrabod, Kattaqo‘rg‘on, Narpay, Paxtachi, Bulung‘ur, Urgut va Jomboy tumanlarida olib borilayotgan ishlar tanqid qilingan. Yo‘llarni asfaltlash, yo‘laklar qurish, yakka tartibdagi uy-joylarni ta’mirlash, elektr energiyasi, ichimlik suvi va boshqa masalalar yuzasidan tanqidiy fikr-mulohazalar bildirilgan.

Viloyat hokimi Erkinjon Turdimov “Obod qishloq” va “Obod mahalla” davlat dasturi doirasida mablag‘lar ajratilayotganini, dasturga kiritilgan mahalla yoki qishloqlar aholisi obod yo‘llar, piyodalar yo‘laklari, suv ta’minoti yoki simyog‘ochlarni yangisiga almashtirish kabi ijobiy o‘zgarishlarni kutib umidvorlik bilan yashayotganini, lekin ayrim rahbarlar bu jarayonga beparvolik qilib, o‘z harakati bilan fuqarolarda davlatga nisbatan norozilik hissini uyg‘otayotganini bildirgan.

Mening qishlog‘im “Obod mahalla”, “Obod qishloq”qa kiritilgan. Odamlar mening “stolba”m qachon almasharkan, ko‘cham, yo‘lim qachon asfalt bo‘larkan, sifatli bo‘larkanmi, shirin suvni qachon ichaman, deb o‘tiribdi. Kim u noinsof, yo‘lni odamlarning ustidan kuladigan qilib ketadigan. Davlatning pulini sovurmoqchi bo‘lgan. Ey vijdonsiz, davlatga nisbatan xalqning nafratini qo‘zg‘ayapsan, norozilik kayfiyatini kuchaytiryapsan, — dedi viloyat hokimi Erkinjon Turdimov.