Isroil hukumatining G‘azo sektorida harbiy amaliyot o‘tkazish uchun sarflagan xarajatlari 48 milliard dollarga yetadi. Bu haqda Leader Capital Market konsalting kompaniyasi ma’lumotlariga tayanib, Bloomberg xabar berdi.
Xabarga ko‘ra, konflikt “mamlakat budjetiga 2023 va 2024-yillarda taxminan 180 milliard shekel (48 milliard dollar) zarar keltiradi”. Bu holda Isroil “umumiy xarajatlarning uchdan ikki qismini o‘z zimmasiga oladi, qolganini esa AQSH to‘laydi”.
Bloomberg Isroil Moliya vazirligi maʼlumotlariga tayanib aniqlik kiritishicha, harbiy harakatlar davom etishi mamlakat budjetiga kuniga 270 million dollarga tushadi.
“Biz bir necha oylik janglarni o‘z ichiga olgan asosiy ssenariy bo‘yicha harakat qilmoqdamiz. Biz Isroil davlatini hozirgi konfliktdan ham ekstremalroq vaziyatlarda ham moliyalashga qodirmiz”, — deydi Isroil Moliya vazirligining bosh hisobchisi Yali Rotenberg.
Avvalroq Isroilning Calcalist iqtisodiy gazetasi Isroilning G‘azo sektoridagi operatsiyasi, agar jangovar harakatlar 2024-yil oxirigacha yakunlansa, eng optimistik hisob-kitoblarga ko‘ra, 200 milliard shekel (taxminan 54 milliard dollar)ga tushishi haqida xabar bergandi.
Izoh (0)