Vashingtondagi Yaqin Sharq siyosati instituti eksperti Metyu Levitt Falastinning HAMAS guruhini kim moliyalashtirishini aytdi. Bu haqda Bild xabar berdi.
Mutaxassis AQSH Kongressiga taqdim etgan hisobotida tegishli ma’lumotlarni kiritdi.
“HAMAS yillar davomida Yevropa Ittifoqi, BMT va boshqa xalqaro tashkilotlardan, Eron, Rossiya, Suriya yoki Qatar kabi davlatlardan, shuningdek, nazorat ostidagi qurilish kompaniyalari va banklardan pul olmoqda”, — deyiladi hujjatda.
Levittning ta’kidlashicha, HAMAS soliqlar, “tovlamachilik”, chegara nazorati va G‘azo sektorini nazorat qilishning boshqa vositalaridan har yili 300 million dollardan 400 million dollargacha daromad oladi.
Birlashgan Millatlar Tashkilotining (BMT) ba’zi hisob-kitoblarga ko‘ra, 2014-yildan 2020-yilgacha G‘azo sektoriga 4,5 milliard dollar sarmoya kiritilgan. G‘azo Yevroittifoq tuzilmalaridan 730 million dollar, Germaniyadan esa yana 360 million dollar olgan.
“Bu pullarning qanchasi HAMAS qo‘liga tushgani noma’lum”, — deydi ekspert.
G‘azo sektoridagi HAMAS “hukumati”ning yillik budjeti kamida 2,4 milliard dollarni tashkil qiladi.
“Shunga qaramay, anklav aholisi qashshoqlikda yashaydi”, — deydi u.
Shuningdek, Levitt HAMAS Rafah (Misr) va Kerem Shalom (Isroil) chegara punktlari orqali G‘azoga kiradigan tovarlarga soliq solishdan yiliga yarim milliard dollar daromad topishini aytmoqda.
HAMAS moliyaviy imperiyasi guruhning bir qancha top-menejerlari tomonidan nazorat qilinadi. Ular HAMAS siyosiy byurosiga bo‘ysunadi, byuroning aksar rahbarlari Turkiya, Misr, Qatar va Iordaniyada surgunda.
“Hatto ba’zilari soxta ismlar va soxta pasportlar bilan faoliyat yuritadi”, — deydi Metyu Levitt.
Izoh (0)