Argentinaning yangi prezidenti davlat OAVlarini sotib yuborishga qaror qildi

Argentinaning yangi prezidenti Xavyer Miley davlatga tegishli Telam yangiliklar agentligi, TV Publica telekanali va Radio Nacional radiostansiyasini xususiy sektorga sotib yubormoqchi ekanini ma’lum qildi.

“Propaganda vazirligining yo‘nalishiga amal qilmayman… TV Publica propaganda mexanizmiga aylanib qoldi deb hisoblaymiz”, — deydi u.

Shuningdek, Miley YPF neft-gaz kompaniyasi hamda Aerolineas Argentinas yirik aviatashuvchisini ham xususiy sektorga sotib ybuorishni rejalashtirmoqda.

“Xususiy sektor qo‘lida bo‘lishi mumkin bo‘lgan narsalarning barchasi ularga o‘tadi”, — deya qo‘shimcha qiladi yangi prezident.

Miley 19-noyabr kuni o‘tkazilgan prezidentlik saylovining yakuniy turida g‘alaba qozondi. Uning raqibi hukmron koalitsiyadan nomzod va amaldagi iqtisodiyot vaziri Serxio Massa edi. Miley oldinroq Markaziy bankni tarqatib yuborish, dollarga o‘tish, Xitoy va Braziliyadagi “kommunistlar” bilan aloqalarni uzish hamda Argentinaning BRIKSga qo‘shilish bo‘yicha arizasini qaytarib olish bilan tahdid qilgandi.

Oktyabr oxirlarida Argentinada prezidentlik saylovlaridan keyin sanab chiqilgan byulletenlarning 76 foizi natijalariga ko‘ra, hukmron Argentina koalitsiyasidan nomzod, iqtisodiyot vaziri Serxio Massa 35,8 foiz ovoz olgandi; unga eng yaqin raqib, deputat Xavyer Miley esa 30,5 foiz.