Italiya sudi mamlakat janubidagi Kalabriya viloyati faoliyat yuritgan “Ndrangeta” jinoiy mafiya guruhiga aloqador 200 dan ortiq kishini turli muddatlarga qamoq jazosiga hukm qildi. Bu so‘nggi 30 yil ichida mamlakatdagi eng yirik mafiya ishi bo‘yicha sud bo‘ldi.
Qayd etilishicha, mazkur ishda 400 dan ortiq modda, jumladan, giyohvandlik vositalari va qurol savdosi, tovlamachilik va mafiya bilan aloqadorlikda ayblangan 338 kishi ishtirok etgan. Prokurorlar 322 ayblanuvchiga jami 5000 yilga yaqin qamoq jazosini so‘ragan.
Natijada sud 131 nafar ayblanuvchini oqlagan va 207 nafarini jami 2000 yildan ortiq qamoq jazosiga hukm qilgan. Hukmning e’lon qilinishi taxminan bir yarim soat davom etgan.
Eng og‘ir jazo “Ndrangeta”ning ikki yetakchiga — Saverio Ratsionale va Domeniko Bonavotega berildi — 30 yillik qamoq jazosi. Ayblanganlar orasida 11 yillik qamoq jazosiga hukm qilingan sobiq deputat Jankarlo Pittelli ham bor.
Hukmlar Lametsiya-Terme shahrida shu maqsadda maxsus qurilgan majmuada bo‘lib o‘tgan qariyb uch yillik sud jarayonini yakunladi. Sud jarayonida yana 70 nafar sudlanuvchi 2021-yil noyabr oyida jazo muddatini qisqartirish evaziga tezkor sud jarayonini tanlab, aybdor deb topildi.
“Ndrangeta” mafiya guruhi haqida
Ayblov e’lon qilingan shaxslarning aksar qismi Italiya, Germaniya, Shveysariya va Bolgariyada 2019-yilda o‘tkazilgan tezkor tadbirlar davomida qo‘lga olingan. Hukm o‘qilgan shaxslardan biri — Mankuzo mafiya klani rahbari — “Amaki” laqabli Luiji Mankuzo hisoblanadi. Hukm o‘qilishidan oldin ham u 20 yil qamoqda o‘tirgan.
Italiya prokuraturasi mamlakatda eng kuchli ta’sir doiralardan biriga ega zamonaviy mafiya guruhi “Ndrageta”ga qarshi sud jarayoni o‘rnak bo‘lishiga umid qilmoqda. Klan qurol-yaroq, odamlar va giyohvand moddalar savdosi bilan shug‘ullanadi, ko‘p milliardlik pul aylanmasiga ega. 2016-yilda uning a’zolari hatto Italiya shimolidagi ko‘chmas mulk operatsiyalarda ham ayblangan.
Izoh (0)