Қашқадарё вилоятида судлар томонидан 2023 йилнинг ўтган даврида чиқарилган қарорларнинг 60 фоиздан кўпи ижро қилинмагани, бунга ижро органларининг лоқайдлиги сабаб қилиб кўрсатилгани хабар берилганди. Қашқадарё вилоят суди ахборот хизмати буни рад этиб чиқди.
ЎзАда берилган хабарга кўра, вилоятда 2023 йилнинг ўтган даврида чиқарилган жами 868 миллиард 117 миллионлик 958 та ёки 60,2 фоиз суд қарорларининг ижроси таъминланмаган.
Бу ҳақда Қашқадарё вилояти суди раиси Абдуқаюм Маҳкамов журналист ва блогерлар билан бўлиб ўтган матбуот анжуманида таъкидлаган ҳамда буни ижро органларининг лоқайдлиги билан изоҳлаган. Суд раисининг қўшимча қилишича, илгари амалиётда бундай ҳолат умуман кузатилмаган.
Вилоят суди ахборот хизматига кўра, нашр Абдуқаюм Маҳкамов берган маълумотни нотўғри талқин қилган.
2023 йилнинг 17 ноябрь куни ўтказилган Қашқадарё вилояти судларининг 2023 йилнинг 9 ойи давомидаги фаолияти таҳлили ҳамда соҳага оид муҳим ва долзарб масалаларга бағишланган матбуот анжуманида вилоят суди раиси Абдуқаюм Маҳкамовнинг ахбороти тингланди. Мазкур ахборотда А.Маҳкамов вилоят судлари қарорларининг ижро аҳволи хусусида тўхталар экан, 2023 йилнинг 9 ойи давомида суд қарорларининг жами 868 миллиард 117 миллион 385 минг 243 сўмлик 958 та ёки 60,2 фоизи ижроси таъминланмаганлигини таъкидлаб ўтган.
Мазкур матбуот анжуманида иштирокчилар томонидан А.Маҳкамовга ушбу мавзуда берилган саволга А.Маҳкамов ўз вақтида ўзаро таққослашлар ўтказиб турилиши ва ҳар қандай айтилган рақамлар статистикадан олинганлигини қайд этиб ўтди.
ЎзА мухбири Ў.Баротовнинг хабарида таъкидлаган “Ушбу ҳолатни А.Маҳкамов бугунги кундаги ижро органларининг лоқайдлиги, илгариги амалиётда бундай ҳолат умуман кузатилмагани билан изоҳлади”, — деган сўзлари ҳақиқатдан йироқ экани билдирилади. Матбуот анжумани давомида ижро органлари шаънига путур етказадиган бу каби иборалар ишлатилмади, — дейилади масъуллар изоҳида.
Мазкур ҳолат ҳақида жамоатчиликка қўшимча қилган Бош прокуратура ахборот хизмати раҳбари Ҳаёт Шамсутдинов Қашқадарё вилояти судлари прокуратура ҳамда суд органлари ўртасида номувофиқлик ва тушунмовчилик келтириб чиқариши мумкин бўлган хабарларни тарқатмасликни сўраганини ёзди.
Вилоят судининг қўшимча қилишича, судлар ва прокуратура органлари мамлакатда қонун устуворлигини таъминлаш борасида ўзаро мувофиқ ҳолда фаолият олиб боради.
Оммавий ахборот воситалари вакиллари ва блогерлардан икки давлат органи ўртасида номувофиқлик ва тушунмовчилик келтириб чиқариши мумкин бўлган юқоридаги каби ҳақиқатга тўғри келмайдиган хабарлар тарқатмасликлари сўралади, — дейилади вилоят ахборот хизмати хабарида.
Изоҳ (0)