Toshkentda bundan bir hafta avval isitish mavsumi boshlangandi. Ijtimoiy tarmoqlarda shahardagi ayrim joylarda, xususan, Chilonzor tumanidagi ko‘pqavatli uylarga issiqlik quvvati yetib bormayotgani haqidagi xabarlar tarqaldi.
Tuman hokimligi matbuot xizmati munosabatiga ko‘ra, kuz-qish mavsumiga har tomonlama mukammal tayyorgarlik ko‘rilgan va ayni vaqtda bu ishlar davom ettirilmoqda. 13-oktyabrdan maxsus ishchi guruh tashkil etilgan holda barcha ko‘p qavatli uylar va ijtimoiy soha obyektlari to‘liq xatlovdan o‘tkazildi. Natijada tumandagi 482 ta obyektlarda, jumladan, 467 ta ko‘p qavatli uyda muammolar aniqlandi va bartaraf etildi.
Bugungi kunda tumanda mavjud 1238 ta ko‘pqavatli uylardan 1219 tasiga issiqlik quvvati yetkazib berildi. Qolgan 19 ta ko‘pqavatli uylarning yerto‘la kommunikatsiya tarmoqlarida aniqlangan kamchiliklar bartaraf etilmoqda va tez kunlarda ushbu uylarga ham issiqlik quvvati to‘liq yetkazib beriladi.
Issiqlik energiyasini yetkazib beruvchi Veolia Energy Tashkent axborotida ma’lum qilinishicha, poytaxtdagi 1 852 ta ijtimoiy obyektning 96 foizida issiqlik ta’minoti ishga tushirildi, 8 900 ta binodan 8 615 ta turar-joy binolarida issiqlik ta’minoti yo‘lga qo‘yildi, bu umumiy binolarning 97 fozini tashkil etadi. Qolgan binolar isitish tizimiga ulanish bosqichida.
Bildirilishicha, agar uyda issiq suv ta’minoti yoki issiqlik ta’minoti bo‘lmasa, dastlab uy ichidagi isitish tizimlariga mas’ul bo‘lgan uy boshqaruvchi kompaniyalarga murojaat qilish lozim. Agar issiqlik energiyasini yetkazib beruvchi tomonidan muammolar aniqlansa, Veolia Energy Tashkent tuman bo‘limlariga murojaat qilish kerak.
Izoh (0)