Yevropa Ittifoqining Rossiyaga qarshi sanksiyalarining 12-paketidan 30 dan ortiq kompaniyalar, jumladan, O‘zbekiston, Qozog‘iston va Singapur firmalari, shuningdek, Rossiyaning bir qancha injiniring kompaniyalari o‘rin olishi mumkin, deb xabar beradi Bloomberg.
Qayd etilishicha, Yevroittifoq Rossiyaga qurol ishlab chiqarishda qo‘llanishi mumkin bo‘lgan stanoklar va ular uchun ehtiyot qismlar eksportini taqiqlashni taklif qilgan. Sanksiyalar paketi, shuningdek, Rossiya olmoslarini yetkazib berishni taqiqlash va mamlakat nefti narxining yuqori chegarasiga qo‘shimcha cheklovlarni ham o‘z ichiga oladi.
Takliflar orasida Rossiyaga kimyoviy mahsulotlar, litiyli akkumulyatorlar, termostatlar va dvigatellar, jumladan, dronlar yetkazib berishni taqiqlash kiradi. Mamlakatlar suyultirilgan propan, quyma temir va shpigeleyzen (temir-marganes qotishmasi), mis va alyuminiy sim, folga, quvurlar hamda armatura importiga cheklovlarni muhokama qiladi.
Olmoslarni olib kirishni taqiqlash 1-yanvardan kuchga kirishi mumkin, parallel ravishda uchinchi mamlakatlarda qayta ishlangan rus olmoslarini olib kirishga bosqichma-bosqich bilvosita taqiq joriy etish rejalashtirilmoqda. G7 mamlakatlari (Buyuk Britaniya, Kanada, Fransiya, Germaniya, Italiya, Yaponiya va AQSH) tashqi ishlar vazirlari o‘tgan hafta Rossiya olmoslariga cheklovlar bo‘yicha kelishuvga erisha olmagandi.
Sanksiyalar paketi loyihasi, shuningdek, rossiyaliklarga kripto-aktivlar uchun hamyonlar, hisoblar va saqlash xizmatlarini taqdim etuvchi Yevropa kompaniyalarida lavozimlarni egallashni taqiqlashni, Yevropadagi rossiyaliklar yoki rossiyalik yuridik shaxslarga tegishli bo‘lgan yoki nazorat qiluvchi kompaniyalardan Yevropa Ittifoqi va boshqa mamlakatlardan mablag‘ o‘tkazish uchun ruxsat so‘rashni talab qilishni o‘z ichiga oladi.
Yevropa Ittifoqi avvalgi sanksiyalar paketini 2023-yil iyun oyida qabul qilgan edi. O‘shanda Rossiyaning axborot xavfsizligi sohasidagi eng yirik kompaniyalaridan biri Positive Technologies sanksiyalar ostida qolgandi. Donetsk, Lugansk, Zaporojye va Xerson viloyatlarida ish boshlagan “Zvezda” teleradiokompaniyasi, Xalqaro hisob-kitob banki va TsMRBank ham sanksiya ro‘yxatiga kiritilgan.
Izoh (0)