AQSH va Xitoy harbiy idoralari “tenglik va o‘zaro hurmat asosida” to‘g‘ridan-to‘g‘ri aloqalarni tiklaydi. Bu haqda ikki davlat rahbarlari Jo Bayden va Si Szinpin 16-noyabr kuni San-Fransiskoda bo‘lib o‘tgan suhbati davomida kelishdi.
Sinxua agentligining xabar berishicha, harbiy aloqalar Xitoy va AQSH Mudofaa vazirliklari o‘rtasidagi ishchi uchrashuvlar, ikki davlat dengiz harbiy xavfsizligi bo‘yicha maslahatlashuv uchrashuvlari va turli darajadagi telefon suhbatlarini ham o‘z ichiga oladi.
Ikki davlat o‘rtasidagi bu aloqalar 2023-yil fevralida AQSh o‘z hududida Xitoy aerostatini urib tushirgandan so‘ng uzilgan edi. Shundan so‘ng Xitoy AQSH harbiy rahbarlarining xitoylik hamkasblari bilan telefon orqali bog‘lanishga bo‘lgan takroriy urinishlarini rad etgandi.
Ushrashuv davomida Si Szinpin AQSHni sanksiyalarni bekor qilishga va Tayvanga qurol yetkazib bermaslikka ham chaqirdi.
“Umid qilamizki, Amerika tomoni Xitoyning xavotiriga jiddiy qaraydi, bir tomonlama sanksiyalarni olib tashlash bo‘yicha chora ko‘radi hamda Xitoy kompaniyalari uchun adolatli va kamsitmaydigan muhitni ta’minlaydi”, — degan Si Szinpin.
Jo Bayden esa Xitoy raisi Isroil va G‘azo sektorida HAMAS guruhi o‘rtasidagi urushga Tehron va u qo‘llab-quvvatlayotgan tashkilotlarning ehtimoliy aralashuvi oldini olish uchun Eronga o‘z ta’siridan foydalanishga chaqirdi.
Izoh (0)