Наманган вилоят божхона бошқармаси томонидан ДХХ, Миллий гвардия ва ички ишлар идоралари ходимлари билан ҳамкорликда тезкор тадбир ўтказилди. Бу ҳақда “Дарё” мухбири Азизбек Абдувалиев хабар бермоқда.
Фото: Наманган вилоят божхона бошқармаси матбуот хизмати
Наманган шаҳрининг Янги Наманган тумани, “Мустақилликнинг беш йиллиги” маҳалласида ўтказилган тадбир давомида Cobalt автомобили тўхтатилиб, холислар иштирокида кўздан кечирилди. Ушбу жараёнда машина юкхонаси ва ўриндиқда ҳеч қандай ҳужжатлари бўлмаган 150 миллион сўмлик 10 минг қути тамаки маҳсулотлари борлиги аниқланди.
Шундан сўнг тезкор тадбир давом эттирилиб, шу туманда яшовчи фуқаронинг хонадони холислар иштирокида кўздан кечирилди. Унинг ҳовлисида қиймати 60 миллион сўмлик 3 минг 990 қути тамаки маҳсулоти борлиги маълум бўлди.
Ўтказилган мазкур тезкор тадбирда жами 210 миллион сўмлик 13 990 қути тамаки маҳсулоти далилий ашё сифатида вақтинча сақловга олинди. Ҳозирда мазкур ҳолат юзасидан суриштирув ҳаракатлари олиб борилмоқда.
Маълумот учун, жорий йилнинг ўтган 10 ойи давомида Наманганда амалга оширилган шу каби тадбирлар давомида жами 2 миллиард 709 миллион сўмлик 320 мингдан ортиқ тамаки маҳсулотларининг ноқонуний айланмасига чек қўйилди.
Изоҳ (0)