“Taftish.uz” axborot agentligining sobiq rahbari sirtdan qamoqqa olindi

Bosh prokuratura huzuridagi iqtisodiy jinoyatlarga qarshi kurashish departamentining Shofirkon tuman bo‘limi tomonidan “Taftish.uz” axborot agentligi sobiq rahbari G‘.A.ga nisbatan jinoyat ishi qo‘zg‘atildi. Bu haqda Buxoro viloyati prokuraturasi axborot xizmati “Daryo”ga maʼlum qildi.

Aniqlanishicha, “Taftish.uz” axborot agentligi sobiq rahbari G‘.A. tuman hududida yashovchi fuqarolarni aldab, agentlikning ijtimoiy tarmoqlardagi kanali orqali ularning muammolarini hal qilib berish evaziga juda ko‘p miqdordagi pullarini olib, shaxsiy ehtiyojlariga ishlatib yuborgan.

Xususan, G‘.A. 2020-yil oktyabrda muqaddam Konimex tumanidagi “Alibek Islom” MCHJ rahbari A.I.ga qarashli bo‘lgan, keyinchalik tuman Qorako‘lchilik shirkati balansiga o‘tkazib yuborilgan 1 400 gektar yaylov yerlarni fermer xo‘jaligi nomiga qayta rasmiylashtirib berish evaziga A.I.dan 5 ming dollar pul va boshqa moddiy qimmatliklarni olib, shaxsiy ehtiyojlari uchun sarflagan.

Fuqaro Q.X.dan tuman hokimligi zaxirasiga olingan 1 800 gektar yaylov yerlarni uning o‘ziga qaytarib olishda yordam berishini aytib, buning evaziga undan jami 22 ming dollar olib, talon-toroj qilgan.

2022-yilning noyabr oyida fuqaro M.S.ga Jinoyat kodeksining 105-moddasi (qasddan badanga o‘rtacha og‘ir shikast yetkazish) bilan sodir etgan jinoyati uchun qamoqqa olish tarzidagi ehtiyot chorasi qo‘llangan vaqtda uning otasi o‘g‘lini qamoqdan chiqarishga yordam berishini aytib aldab, 5 ming dollarni firibgarlik yo‘li bilan qo‘lga kiritgan. Tergovga qadar tekshiruvda M.S.ning appelyatsiya sudlov bosqichida jabrlanuvchi bilan yarashgani sababli qamoqdan ozod etilgani aniqlangan.

2022-yilning aprel oyida fuqaro A.H.ning Andijon viloyati (Milliy gvardiya)da ishlovchi ukasi A.H.ning ishini Buxoro viloyatiga ko‘chirib berish evaziga undan firibgarlik yo‘li bilan 800 dollar olib, shaxsiy ehtiyojlari uchun sarflagan.

Yana bir holatda “Taftish.uz” axborot agentligi sobiq rahbari G‘.A. 2021-yilning bahorida J.U.dan 10-15 kunda qaytarib berish sharti bilan 500 dollar olib, qaytarmasdan, aldab kelgan.

Qayd qilingan holatlarda G‘.A. fuqarolarni aldash orqali ularning jami 33 ming 300 dollarini o‘zlashtirib olib, talon-toroj qilib yuborgan. Mazkur harakatlari uchun “Taftish.uz” axborot agentligi sobiq rahbari G‘.A. 2023-yilning 6-noyabr kuni Jinoyat kodeksining 168-moddasi 3-qismi “b” bandi (firibgarlik — takroran yoki xavfli retsidivist tomonidan), 168-moddasi 4 - qismi “a” bandi (firibgarlik — juda ko‘p miqdorda) hamda 25, 211-moddasi 2-qismi “a” bandi bilan ishda ayblanuvchi tariqasida jalb qilinib, sirtdan qamoqqa olish tarzidagi ehtiyot chorasi qo‘llangan.

Hozirgi kunda Peshku tuman ichki ishlar bo‘limi tomonidan tergov harakatlari olib borilmoqda.