“Atmosfera havosiga transport vositalarining salbiy ta’sirini kamaytirish bo‘yicha chora-tadbirlar to‘g‘risida” Vazirlar Mahakamasi qarori loyihasi muhokama uchun e’lon qilindi.
Unda atmosfera havosiga zararli ta’siri transport vositalari tashlamalarining normativlaridan yuqori bo‘lgan transport vositalariga nisbatan kompensatsiya to‘lovlarini va (yoki) ulardan foydalanishni cheklash choralarini tatbiq etish taklif etilmoqda.
Transport vositalari tashlamalarining normativlarga mosligini nazorat qilish laboratoriya sinovlarini o‘tkazish orqali quyidagi bosqichlarda amalga oshirish rejalashtirilmoqda:
- 2024-yil 1-iyuldan boshlab — barcha davlat va xo‘jalik boshqaruvi organlari, davlat korxonalari va ustav kapitalida davlat ulushi bo‘lgan tashkilotlar foydalanuvida bo‘lgan transport vositalari uchun majburiy tartibda;
- 2025-yil 1-yanvardan boshlab — barcha boshqa yuridik shaxslar foydalanuvida bo‘lgan transport vositalari uchun ixtiyoriy tartibda;
- 2025-yil 1-iyuldan boshlab — barcha jismoniy shaxslar foydalanuvida bo‘lgan transport vositalari uchun ixtiyoriy tartibda.
Atmosfera havosiga zararli ta’siri transport vositalari tashlamalarining normativlaridan yuqori bo‘lgan transport vositalari bo‘yicha yuridik shaxslarga kompensatsiya to‘lovlarini tatbiq etish va 2025-yil 1-sentyabrdan tashlamalarining normativlarga mosligi tasdiqlanmagan transport vositalaridan Toshkent va Nukus shaharlari hamda viloyat markazlari hududida foydalanishni man etish ko‘zda tutilmoqda.
Jismoniy shaxslarga ham 2025-yil 1-sentyabrdan tashlamalarining normativlarga mosligi tasdiqlanmagan transport vositalaridan Toshkent va Nukus shaharlari hamda viloyat markazlari hududida foydalanish taqiqlash choralari qo‘llanadi.
Transport vositalari tashlamalarining normativlarga mosligini nazorat qilish uchun “Eko post”lar tashkil etiladi. Transport vositalarini majburiy texnik ko‘rikdan o‘tkazish jarayonlarida transport vositalari tashlamalarining normativlarga muvofiqligini baholash talab etilmaydi.
Izoh (0)