HAMAS Buyuk Britaniya, Kanada, Moldova, Ukraina, Germaniya kabi bir qator davlatlar fuqarolariga G‘azodan chiqib ketishga ruxsat berdi

Falastinning HAMAS harakati 7-noyabr kuni Rafah nazorat punkti orqali G‘azo sektorini tark etishi mumkin bo‘lgan chet el fuqarolari va ikki fuqarolikka ega falastinliklar ro‘yxatini e’lon qildi. Bu haqda anklav chegara xizmatining Facebook’dagi sahifasida e’lon qilingan bayonotida aytiladi.

“Biz 7-noyabr kuni Rafah nazorat-o‘tkazish punkti orqali o‘tishi mumkin bo‘lgan boshqa davlat pasporti egalari ro‘yxatini e’lon qilmoqdamiz. Hujjatda ko‘rsatilgan fuqarolar nazorat-o‘tkazish punktida soat 07:00 da hozir bo‘lishi kerak”, — deyiladi xabarda. 

HAMAS tomonidan e’lon qilingan ro‘yxatlarda Buyuk Britaniya, Kanada, Moldova, Ruminiya, Ukraina, Filippin, Fransiya va Germaniya fuqarolari bor. Hammasi bo‘lib, HAMAS tomonidan e’lon qilingan faylda kamida 603 kishining nomi ko‘rsatilgan.

6-noyabr kuni G‘azodagi Chegara o‘tish joylari bosh boshqarmasi Rafahdan ro‘yxatlarga nomlari kiritilgan xorijliklar va misrliklarning o‘tishi uchun ochiq ekanini ma’lum qilgandi.