Ukrainada 2024-yil prezidentlik saylovlari bo‘lib o‘tadi

Ukrainada 2024-yil mart oyida prezidentlik saylovlari bo‘lib o‘tadi. Bu haqda mahalliy Espresso nashri xabar berdi.

Ukraina xalq deputati Aleksey Goncharenkoga ko‘ra, mamlakat rahbari Vladimir Zelenskiy prezidentlik saylovlarini 2024-yil 31-martda o‘tkazish to‘g‘risidagi qarorni ma’qullagan.

“Mening maʼlumotlarimga ko‘ra, Zelenskiy kelasi yil prezidentlik saylovlarini o‘tkazishga qaror qilgan. U Ukraina prezidenti ofisiga 2024-yil 31-mart kuni bo‘lib o‘tishi rejalashtirilgan saylovlarga tayyorgarlik ko‘rishni topshirgan.

Bu konstitutsiyaviy muddatga o‘xshaydi — mart oyining oxirgi yakshanbasi. Ular tegishli qaror g‘arblik sheriklarining talabi sababli amalga oshishini jamoatchilikka tushuntirmoqchi. Xususan, saylovlar o‘tkazilmasa, Zelenskiy legitimligini yo‘qotadi. Ayniqsa, Putin mart oyida saylov o‘tkazishni rejalashtirayotganini hisobga olsak”, — dedi Goncharenko.

Shu bilan birga, Goncharenko g‘arblik hamkorlar Ukrainadan saylov o‘tkazishni talab qilmasligini aytdi.

“Ishontirishim mumkinki, g‘arbiy hamkorlarimiz bizdan saylovlar o‘tkazishni talab qilmayapti. Hech qanday ommaviy yoki nodavlat talablar yo‘q. Buni bizning hamkorlarimizga hech qanday aloqasi yo‘q. Bu faqat prezident ofisi tomonidan qo‘yilgan siyosiy vazifalardir. Gap faqat prezidentlik saylovlari haqida ketmoqda, chunki parlament saylovlari Ukraina konstitutsiyasi tomonidan to‘g‘ridan to‘g‘ri taqiqlangan”, — deya taʼkidladi u.