Qashqadaryo viloyatining Yakkabog‘ tumani hokimi Lutfiddin Abdullayevning tumandagi fermerlarga majburan ariza yozdirib, yerini tortib olishga urinayotgani eshitilgan audio jamoatchilik e’tiboriga havola qilingan edi. Yakkabog‘ hokimining mazkur qilmishi viloyat rahbari tanqidiga sabab bo‘ldi. Bu haqdagi xabarlarni “Daryo”ga viloyat hokimligi axborot xizmati rahbari Ahror Sodiqov tasdiqladi.
Oldimizda qancha masala turibdi, xalqimiz qarab turibdi, yelkada mas’uliyat bor. Siz esa, ijtimoiy tarmoqlarda aylanib yuripsiz. Har xil gaplarni gapirib, ishingizni qiling. Bu gap faqat sizga tegishli emas, hamma yelkasidagi mas’uliyatni bajarsin, — degan Murodjon Azimov bugun bo‘lib o‘tgan hokimlik soatida.
Bloger Azizbek Yazdurdiyevning yozishicha, viloyat hokimi Murodjon Azimov yig‘ilishda yana taniqidiy fikrlar bildirgan. Hokimlikda faoliyat yuritmasa-da, “hokimiyatdan chiqyapman” mazmunida topshiriqlar berish holatlari bo‘yicha murojaatlar kelayotganini bildirgan.
“Daryo” manbasining qo‘shimcha qilishicha, Murodjon Azimov, shuningdek, Yakkabog‘ hokimini boshqa tashkilotlar nomidan foydalanmaslikka chaqirgan.
Lutfiddin Abdullayevning tarmoqlarda tarqalgan fermerlar bilan muloqotida bir nechta fermer ariza yozishdan bosh tortgani va belgilangan rejani bajarayotganini bildirgandi. Fermerlardan biri hokimning bu talabiga javoban, belgilangan rejani 96-97 foiz bajarayotganini aytadi. Hokim bunga e’tibor ham qilmay, kimgadir ariza qanday yozilishi kerakligini aytib turishini, ariza viloyat hokimi yoki viloyat Kadastr boshqarmasi boshlig‘iga yozilishini qo‘shimcha qilgan.
Hokim, shuningdek, fermerlarga belgilangan rejani bajarsa, g‘allasini eksa, arizasini qaytarib olib ketishini aytadi. Biroq ariza yozmagan fermerlarni esa zo‘ravonlarcha avtobusga bosib, tuman IIBga olib borish kerakligini, ular bilan o‘zi gaplashishini, shu paytgacha birortasiga tegmaganini pisanda qiladi.
Izoh (0)