Қашқадарё вилоятининг Муборак туманида фаолият юритувчи тадбиркор бизнес-омбудсман девонининг вилоятдаги шўбасига мурожаат қилиб, унга солиқ органи томонидан асоссиз равишда 414 миллион сўмлик солиқ қарздорлиги чиққанини, унинг фоизи 200 миллион сўмдан ошганини айтиб, ёрдам сўраган. Бу ҳақда “Дарё”га бизнес-омбудсман девонининг вилоятдаги вакили Шероз Шодиев хабар берди.
Аниқланишича, мазкур ҳолат бизнес-омбудсман кўмагида бартараф этилган.
Бизнес-омбудсман девонига Муборак туманида фаолият юритувчи “Фаровон” МЧЖ (тадбиркорлик субъектининг номи ўзгартирилган) солиқ органлари томонидан асоссиз қарздорлик юзага келтирилганидан норози бўлиб мурожаат қилди. Муборак туман солиқ инспекцияси мансабдор шахслари томонидан 2019 йил 26 декабрда МЧЖга асоссиз тарзда қўшилган қиймат солиғидан 414 миллион 679 минг 732 сўмлик қарздорлик ёзилган. Юзага келган асоссиз қарздорликни тўлаш лозимлиги тўғрисида МЧЖга Қашқадарё вилоят солиқ бошқармаси томонидан 2023 йил 27 январда талабнома юборилган. Шунингдек, қарздорлик сабабли МЧЖнинг қўшилган қиймат солиғи тўловчиси сифатида рўйхатдан ўтказилгани тўғрисида гувоҳноманинг амал қилиш муддати 2023 йил 3 февралдан тўхтатилган. 2023 йил 11 февралда МЧЖга тегишли кўчмас мулкка нисбатан тақиқ қўйилган. МЧЖнинг ушбу ҳолат юзасидан бир қанча ваколатли давлат органлари ва ташкилотларига йўллаган мурожаати эътиборсиз қолган, — дейди Шероз Шодиев.
Оқибатда 12 та доимий иш ўрнига эга ҳамда йилига ўртача 500 минг доллар экспорт қилувчи корхонанинг фаолияти вақтинча тўхтаб қолган.
МЧЖнинг мурожаати бизнес-омбудсман девонининг Қашқадарё вилоятидаги шўбаси томонидан ўрганилган вақтда асоссиз қарздорлик фоиз ҳисоблангани сабабли 633 миллион 619 минг сўмни ташкил қилган. Ушбу қонунбузилиш ҳолати юзасидан бизнес-омбудсман томонидан Қарши туманлараро маъмурий судига МЧЖ манфаатига ариза киритилди. Қарши туманлараро маъмурий судининг 2023 йил 21 августдаги ҳал қилув қарори билан ариза қаноатлантирилиб, солиқ органи мансабдор шахслари зиммасига МЧЖга нисбатан асоссиз ҳисобланган солиқ суммасини ҳисобдан чиқариш мажбурияти юкланди, — дейди масъул.
Қўшимча қилинишича, вилоят маъмурий судининг 2023 йил 17 октябрдаги қарори билан солиқ органининг аппеляция шикояти рад қилиниб, биринчи инстанция судининг қарори ўз кучида қолдирилган.
Изоҳ (0)