Тошкент метросида унутиб қолдирилган буюм яна поездларнинг кечикишига сабаб бўлди

Тошкент метрополитени “Беруний” бекатида поездларнинг белгиланган вақтдан кечикиши кузатилгани айтилган хабарларга муносабат билдирди.

Қайд этилишича, 3 ноябрь куни соат 07:57 лар атрофида “Беруний” бекатига кириб келган 33-сонли ҳаракат таркиби метрополитен ходимлари томонидан текширилганда, назоратсиз буюм мавжудлиги аниқланган.

Йўловчилар ва ҳаракат хавфсизлигини таъминлаш мақсадида, белгиланган йўриқномага асосан, ушбу поезд текширув йўлагига юборилган. Текширув натижалари давомида ушбу назоратсиз буюм йўловчилардан бирининг шахсий буюми экани аниқланган.

Бунинг натижасида эса йўналишдаги поездлар белгиланган жадвалдан бир муддат кечиккан ҳолда ҳаракатланган.

“Шу ўринда йўловчилардан метро хизматидан фойдаланишда ўз шахсий буюмларига эътиборли бўлишларини яна бир бор эслатиб ўтамиз. Бу метро поездлари йўналишларда белгиланган жадвалга асосан ҳаракатланиши учун асосий туртки бўлаётганини маълум қиламиз”, — дейилади муносабатда.

Аввалроқ 3—5 ноябрь кунлари 3 кун муддатга, “Ер усти ҳалқа йўли” йўналишининг “Толариқ” (10-бекат), “Хонобод” (11-бекат) ва “Қурувчилар” (12-бекат) бекатларида поездлар ҳаракати тўхтатилиши тўғрисида хабар берилганди. Октябрь ўрталарида Тошкент метрополитени охирги вақтда йўловчилар сони ошиб кетгани боис мурожаат билан чиқиб, “янги вагонлар келишига 2 ой қолгани”ни маълум қилган эди.