2023-yilning 9 oyi davomida O‘zbekistondagi IT-Park rezidentlarining eksport hajmi o‘tgan yilning shu davriga nisbatan qariyb 3 baravar ko‘paydi. Bu haqda O'zbekiston Respublikasi raqamli texnologiyalar vaziri Sherzod Shermatov ma’lum qildi.
IT Park rezidentlarining xizmatlari eksporti o‘sish sur’ati ichki bozordagi xizmatlardan yuqori bo‘lib qolayotgani hali eksportga chiqmagan IT kompaniyalar uchun ham ko‘proq eksport bo‘yicha ishlash kerakligiga yana bir signaldir. 1470 ta rezidentdan 305 ta ta’lim rezidentlarini chiqarib tashlasa, qolgan kompaniyalarning deyarli yarmi, ya’ni 520 tasi eksportyor va yuqori daromadli ishchi o‘rinlar yaratishda ishtirok etishmoqda.
2023-yilning 9 oyi davomida IT Park rezidentlarining eksport hajmi o‘tgan yilning shu davriga nisbatan qariyb 3 baravar ko‘payib, 238,7 million dollarni tashkil etdi. Asosiy eksport yo‘nalishlari Shimoliy Amerika (43%), Yevropa Ittifoqi va Buyuk Britaniya (37%), hamda MENA (4%) (Yaqin Sharq va Shimoliy Afrika) mamlakatlari hissasiga to‘g‘ri keladi.
Shuningdek, IT-Park rezident kompaniyalari tomonidan ko‘rsatilgan xizmatlarning umumiy hajmi 3,8 trillion so‘mdan 8,5 trillion so‘mga yetdi — bu o‘tgan yilning mos davrga nisbatan 2,2 barobar ko‘pdir.
Eksportga yo‘naltirilgan rezident kompaniyalar soni ham sezilarli darajada oshib, 520 taga yetdi. Shundan 316 tasi IT xizmatlar, 204 tasi esa BPO xizmatlari sohasida faoliyat ko‘rsatmoqda.
Izoh (0)