2023 йилнинг 9 ойи давомида Ўзбекистондаги IT-Park резидентларининг экспорт ҳажми ўтган йилнинг шу даврига нисбатан қарийб 3 баравар кўпайди. Бу ҳақда Ўзбекистон Республикаси рақамли технологиялар вазири Шерзод Шерматов маълум қилди.
IT Park резидентларининг хизматлари экспорти ўсиш суръати ички бозордаги хизматлардан юқори бўлиб қолаётгани ҳали экспортга чиқмаган IT компаниялар учун ҳам кўпроқ экспорт бўйича ишлаш кераклигига яна бир сигналдир. 1470 та резидентдан 305 та таълим резидентларини чиқариб ташласа, қолган компанияларнинг деярли ярми, яъни 520 таси экспортёр ва юқори даромадли ишчи ўринлар яратишда иштирок этишмоқда.
2023 йилнинг 9 ойи давомида IT-Park резидентларининг экспорт ҳажми ўтган йилнинг шу даврига нисбатан қарийб 3 баравар кўпайиб, 238,7 миллион долларни ташкил этди. Асосий экспорт йўналишлари Шимолий Америка (43%), Европа Иттифоқи ва Буюк Британия (37%) ҳамда MENА (4%) (Яқин Шарқ ва Шимолий Африка) мамлакатлари ҳиссасига тўғри келади.
Шунингдек, IT-Park резидент компаниялари томонидан кўрсатилган хизматларнинг умумий ҳажми 3,8 триллион сўмдан 8,5 триллион сўмга етди — бу ўтган йилнинг мос даврга нисбатан 2,2 баробар кўпдир.
Экспортга йўналтирилган резидент компаниялар сони ҳам сезиларли даражада ошиб, 520 тага етди. Шундан 316 таси IT хизматлар, 204 таси эса BPО хизматлари соҳасида фаолият кўрсатмоқда.
Изоҳ (0)