Shavkat Mirziyoyev O‘zbekiston—Fransiya sherikligini kengaytirish bo‘yicha to‘rtta eng ustuvor yo‘nalishni ko‘rsatib o‘tdi

Fransiya prezidenti Emmanuel Makronning O‘zbekistonga rasmiy tashrifining ishbilarmonlik dasturi doirasida Samarqand shahrida qo‘shma biznes forumi bo‘lib o‘tdi. Uning ishida ikki davlat rahbarlari ishtirok etdi, deb xabar bermoqda prezident matbuot xizmati.

Qayd etilishicha, forumda so‘zga chiqqan davlat rahbari o‘z nutqida yetakchilar kelgusida savdo hajmlarini keskin oshirish, Fransiya kompaniyalarining investitsiyaviy faoliyatini faollashtirish masalalariga har tomonlama ko‘maklashishga kelishib olganlarini qayd etdi.

Shavkat Mirziyoyev O‘zbekiston—Fransiya sherikligini kengaytirish bo‘yicha to‘rtta eng ustuvor yo‘nalishni ko‘rsatib o‘tdi:

• yashil iqtisodiyot sohasida Fransuz biznesi bilan strategik hamkorlikni rivojlantirish;
• startegik xomashyo resurslarini ilg‘or texnologiyalar asosida qayta ishlash va sanoat mahsulotlarini eksportga yo‘naltirish;
• suv resurslarini samarali boshqarish va zamonaviy infratuzilmani barpo etish;
• qishloq xo‘jaligi raqobatbardoshligini oshirish, sohaga qo‘shilgan qiymat yaratish.

Yashil iqtisodiyot sohasida EDF, Voltalia va Total Energies kompaniyalari bilan yirik loyihalar boshlangan. Strategik xomashyo resurslarini chuqur qayta ishlash va ilg‘or texnologiyalar asosida sanoat mahsulotlarini ishlab chiqarish bo‘yicha Orano kompaniyasi bilan sheriklikni kengaytirish rejalashtirilmoqda. Suv resurslaridan samarali foydalanish va zamonaviy infratuzilmani barpo etish borasida SUEZ, Eiffage va Veolia kompaniyalari bilan birgalikda O‘zbekiston suv taʼminoti va isitish tizimlarini modernizatsiya qilish bo‘yicha katta ishlar olib borilmoqda. Qishloq xo‘jaligida raqobatbardoshlikni oshirish va oziq-ovqat xavfsizligini taʼminlash uchun O‘zbekistonda zamonaviy agrologistika majmualarini qurish bo‘yicha Fransiya tomonidan bilan faol hamkorlik qilinishi kutilmoqda.

Prezident o‘zbek-fransuz hamkorligining imkoniyat va salohiyatlari juda yuqoriligi, ikki davlat iqtisodiyotlari bir-birini samarali to‘ldirishi mumkinligini qayd etdi.

“Yangi O‘zbekistonda ishlash uchun fransiyalik hamkorlarimizga eshiklarimiz doim ochiq ekanini, qanday foydali qo‘shma loyihalaringiz bo‘lsa, amalga oshirishga doim tayyorligimizni taʼkidlamoqchiman”, —  dedi davlat rahbari so‘zining yakunida.

Fransiya prezidenti Emmanuel Makron ham biznes forum ishtirokchilariga murojaat qildi. U prezident Shavkat Mirziyoyev tomonidan amalga oshirilayotgan islohotlarni to‘liq qo‘llab-quvvatlab, ushbu siyosat tufayli ikki tomonlama investitsiyaviy hamkorlik uchun katta imkoniyatlar ochilganini qayd etdi.

O‘zaro manfaatli sheriklikda mavjud ulkan salohiyatni yanada faol ishga solishga chaqirdi, bundan mamlakatlarimiz iqtisodiyotlari va xalqlari manfaat topishiga ishonch bildirdi.

Biznes forumi yakunida energetika, metallurgiya, suv taʼminoti, qishloq xo‘jaligi, transport va boshqa muhim sohalarda erishilgan kelishuvlar bo‘yicha salmoqli hujjatlar to‘plami imzolandi.