Шавкат Мирзиёев Ўзбекистон—Франция шериклигини кенгайтириш бўйича тўртта энг устувор йўналишни кўрсатиб ўтди

Франция президенти Эммануэль Макроннинг Ўзбекистонга расмий ташрифининг ишбилармонлик дастури доирасида Самарқанд шаҳрида қўшма бизнес форуми бўлиб ўтди. Унинг ишида икки давлат раҳбарлари иштирок этди, деб хабар бермоқда президент матбуот хизмати.

Қайд этилишича, форумда сўзга чиққан давлат раҳбари ўз нутқида етакчилар келгусида савдо ҳажмларини кескин ошириш, Франция компанияларининг инвестициявий фаолиятини фаоллаштириш масалаларига ҳар томонлама кўмаклашишга келишиб олганларини қайд этди.

Шавкат Мирзиёев Ўзбекистон—Франция шериклигини кенгайтириш бўйича тўртта энг устувор йўналишни кўрсатиб ўтди:

• яшил иқтисодиёт соҳасида Француз бизнеси билан стратегик ҳамкорликни ривожлантириш;
• стартегик хом ашё ресурсларини илғор технологиялар асосида қайта ишлаш ва саноат маҳсулотларини экспортга йўналтириш;
• сув ресурсларини самарали бошқариш ва замонавий инфратузилмани барпо этиш;
• қишлоқ хўжалиги рақобатбардошлигини ошириш, соҳага қўшилган қиймат яратиш.

Яшил иқтисодиёт соҳасида EDF, Voltalia ва Total Energies компаниялари билан йирик лойиҳалар бошланган. Стратегик хом ашё ресурсларини чуқур қайта ишлаш ва илғор технологиялар асосида саноат маҳсулотларини ишлаб чиқариш бўйича Orano компанияси билан шерикликни кенгайтириш режалаштирилмоқда. Сув ресурсларидан самарали фойдаланиш ва замонавий инфратузилмани барпо этиш борасида SUEZ, Eiffage ва Veolia компаниялари билан биргаликда Ўзбекистон сув таъминоти ва иситиш тизимларини модернизация қилиш бўйича катта ишлар олиб борилмоқда. Қишлоқ хўжалигида рақобатбардошликни ошириш ва озиқ-овқат хавфсизлигини таъминлаш учун Ўзбекистонда замонавий агрологистика мажмуаларини қуриш бўйича Франция томонидан билан фаол ҳамкорлик қилиниши кутилмоқда.

Президент ўзбек-француз ҳамкорлигининг имконият ва салоҳиятлари жуда юқорилиги, икки давлат иқтисодиётлари бир-бирини самарали тўлдириши мумкинлигини қайд этди.

“Янги Ўзбекистонда ишлаш учун франциялик ҳамкорларимизга эшикларимиз доим очиқ эканини, қандай фойдали қўшма лойиҳаларингиз бўлса, амалга оширишга доим тайёрлигимизни таъкидламоқчиман”, —  деди давлат раҳбари сўзининг якунида.

Франция президенти Эммануэль Макрон ҳам бизнес форум иштирокчиларига мурожаат қилди. У президент Шавкат Мирзиёев томонидан амалга оширилаётган ислоҳотларни тўлиқ қўллаб-қувватлаб, ушбу сиёсат туфайли икки томонлама инвестициявий ҳамкорлик учун катта имкониятлар очилганини қайд этди.

Ўзаро манфаатли шерикликда мавжуд улкан салоҳиятни янада фаол ишга солишга чақирди, бундан мамлакатларимиз иқтисодиётлари ва халқлари манфаат топишига ишонч билдирди.

Бизнес форуми якунида энергетика, металлургия, сув таъминоти, қишлоқ хўжалиги, транспорт ва бошқа муҳим соҳаларда эришилган келишувлар бўйича салмоқли ҳужжатлар тўплами имзоланди.