O‘zbekistonda 2023—2025-yillar davomida 1,2 million yoshlar 8 ta yo‘nalish bo‘yicha onlayn kurslarda bepul o‘qitiladi.
Bugun aholining raqamli savodxonligini oshirish va axborot texnologiyalardan foydalanish ko‘nikmalarini shakllantirish zamonaviy dunyoning asosiy talab va mezoniga aylandi. Oddiy misol sifatida internetdan foydalana olish ko‘nikmasini keltirish mumkin. Tadqiqotlarga ko‘ra, joriy yilning yanvar holatiga O‘zbekistonda 26,74 million internet foydalanuvchisi bor. Shundan 5,35 millioni ijtimoiy tarmoqlardan foydalanadi va bu raqam umumiy ko‘rsatkichning 20 foiziga teng.
Garchi internet foydalanuvchilari soni umumiy aholi soniga nisbatan deyarli 75 foizni tashkil qilsa-da, dunyoda keng tarqalgan ijtimoiy tarmoqlardan aholining bor-yo‘g‘i 15 foizi foydalana oladi. Bu ko‘rsatkich 36 million nafardar ortiq aholini hisobga olganda, ancha kam. Shuning uchun raqamli savodxonlik va axborot madaniyatini rivojlantirish masalasi dolzarb bo‘lib qolmoqda. Ushbu maqsadda respublikaning barcha tuman va shaharlarida raqamli texnologiyalar o‘quv markazlari faoliyati bosqichma-bosqich yo‘lga qo‘yilyapti.
Hozirda respublika bo‘yicha 205 ta raqamli texnologiyalar o‘quv markazlarida 400 ga yaqin yangi ish o‘rinlari yaratildi. Markazlarda 2022-yilda jami 144 ming nafardan ortiq tinglovchilar, shu jumladan, 29 ming nafar davlat xodimlari va 115 ming yoshlar malaka oshirdi. Joriy yil davomida mazkur markazlarda jami 180 ming nafar yoshlar va xodimlar IT yo‘nalishi bo‘yicha o‘qitilishi rejalashtirilgan.
Bugun raqamli savodxonlik kiberjinoyatlardan himoyalanish uchun ham zarur bo‘lmoqda. Media olamida aldanib qolmaslik, shaxsiy maʼlumotlar dahlsizligini saqlash uchun ham inson zaruriy ko‘nikmalarni egallashiga to‘g‘ri keladi. Aytish kerak, respublikada bu borada bir qator choralar ko‘rilyapti. Masalan, taʼlim tashkilotlari, ommaviy axborot vositalari va boshqa resurslar orqali raqamli maydonda kuzatilib turgan kiberjinoyatlarni oldini olish, ulardan saqlanish uchun mediasavodxonlik darslari tashkil etilmoqda, axborot maʼlumotlari tarqatilmoqda. Ushbu tadbirlar natijasida aholi orasida raqamli shaxsiy maʼlumotlarni uchinchi shaxslarga bermaslikdan tortib, fishing va boshqa kiberjinoyatlarni oldini olishga qaratilgan zaruriy ko‘nikmalar shakllantirilmoqda.
Shu bilan birga, “Raqamli O‘zbekiston – 2030” strategiyasini muvaffaqiyatli amalga oshirishning eng muhim shartlaridan biri aholining raqamli savodxonligini oshirishdan iboratdir. Jumladan, Strategiyaga binoan, davlat maktabgacha taʼlim tashkilotlarini 100 foiz kompyuter sinfi bilan taʼminlash orqali tarbiyalanuvchilarda boshlang‘ich kompyuter savodxonligi ko‘nikmalarini shakllantirish ishlari olib borilmoqda.
Yoshlar orasida raqamli savodxonlikni targ‘ib qilish hamda kompyuter dasturlash va IT-sohasiga keng jalb qilish maqsadida “Bir million dasturchi” loyihasi joriy qilindi va ushbu loyiha doirasida yoshlarga dasturlash tillarini o‘rgatish ishlari amalga oshirildi. “Bir million dasturchi” loyihasi doirasida 2021—2022-yillarda yoshlarni kompyuter dasturlashga qiziqadigan yoshlarni aniqlash, o‘qitish va ish bilan taʼminlashga qaratilgan kompleks chora-tadbirlar dasturi tasdiqlandi. Hozirda “Bir million dasturchi” loyiha doirasida 2,5 million nafardan ortiq foydalanuvchi ro‘yxatdan o‘tgan. Shundan 1,7 million nafardan ortiq ishtirokchi loyiha doirasida taʼlim olib, bitiruvchi sertifikatlarni qo‘lga kiritgan.
Shuningdek, “Bir million dasturchi” doirasida va IT-Parkning taʼlim rezidentlarida IT sertifikatni qo‘lga kiritgan yoshlarga kompyuter xaridi uchun 8,2 million so‘m miqdoridagi imtiyozli kredit ularning shaxsiy plastik kartasiga o‘tkazib berishi tartibi yo‘lga qo‘yildi.
“Bir million dasturchi” loyihasini mantiqiy keyingi bosqichini amalga oshirish maqsadida uzbekcoders platformasi orqali Coursera onlayn kurslarida yoshlar uchun taʼlim olish imkoniyati yaratildi.
2023—2024-yillarda platformaning barcha kontentlaridan foydalanish imkoniyatini beruvchi 10 ming dona professional kurslar uchun litsenziyalar olinadi, 2023—2025-yillar davomida 1,2 million yoshlar 8 ta yo‘nalish bo‘yicha onlayn kurslarda bepul o‘qitiladi.
Izoh (0)