Ўзбекистонда 2023—2025 йиллар давомида 1,2 миллион ёшлар 8 та йўналиш бўйича онлайн курсларда бепул ўқитилади.
Бугун аҳолининг рақамли саводхонлигини ошириш ва ахборот технологиялардан фойдаланиш кўникмаларини шакллантириш замонавий дунёнинг асосий талаб ва мезонига айланди. Оддий мисол сифатида интернетдан фойдалана олиш кўникмасини келтириш мумкин. Тадқиқотларга кўра, жорий йилнинг январь ҳолатига Ўзбекистонда 26,74 миллион интернет фойдаланувчиси бор. Шундан 5,35 миллиони ижтимоий тармоқлардан фойдаланади ва бу рақам умумий кўрсаткичнинг 20 фоизига тенг.
Гарчи интернет фойдаланувчилари сони умумий аҳоли сонига нисбатан деярли 75 фоизни ташкил қилса-да, дунёда кенг тарқалган ижтимоий тармоқлардан аҳолининг бор-йўғи 15 фоизи фойдалана олади. Бу кўрсаткич 36 миллион нафардар ортиқ аҳолини ҳисобга олганда, анча кам. Шунинг учун рақамли саводхонлик ва ахборот маданиятини ривожлантириш масаласи долзарб бўлиб қолмоқда. Ушбу мақсадда республиканинг барча туман ва шаҳарларида рақамли технологиялар ўқув марказлари фаолияти босқичма-босқич йўлга қўйиляпти.
Ҳозирда республика бўйича 205 та рақамли технологиялар ўқув марказларида 400 га яқин янги иш ўринлари яратилди. Марказларда 2022 йилда жами 144 минг нафардан ортиқ тингловчилар, шу жумладан, 29 минг нафар давлат ходимлари ва 115 минг ёшлар малака оширди. Жорий йил давомида мазкур марказларда жами 180 минг нафар ёшлар ва ходимлар IT йўналиши бўйича ўқитилиши режалаштирилган.
Бугун рақамли саводхонлик кибержиноятлардан ҳимояланиш учун ҳам зарур бўлмоқда. Медиа оламида алданиб қолмаслик, шахсий маълумотлар даҳлсизлигини сақлаш учун ҳам инсон зарурий кўникмаларни эгаллашига тўғри келади. Айтиш керак, республикада бу борада бир қатор чоралар кўриляпти. Масалан, таълим ташкилотлари, оммавий ахборот воситалари ва бошқа ресурслар орқали рақамли майдонда кузатилиб турган кибержиноятларни олдини олиш, улардан сақланиш учун медиасаводхонлик дарслари ташкил этилмоқда, ахборот маълумотлари тарқатилмоқда. Ушбу тадбирлар натижасида аҳоли орасида рақамли шахсий маълумотларни учинчи шахсларга бермасликдан тортиб, фишинг ва бошқа кибержиноятларни олдини олишга қаратилган зарурий кўникмалар шакллантирилмоқда.
Шу билан бирга, “Рақамли Ўзбекистон – 2030” стратегиясини муваффақиятли амалга оширишнинг энг муҳим шартларидан бири аҳолининг рақамли саводхонлигини оширишдан иборатдир. Жумладан, Стратегияга биноан, давлат мактабгача таълим ташкилотларини 100 фоиз компьютер синфи билан таъминлаш орқали тарбияланувчиларда бошланғич компьютер саводхонлиги кўникмаларини шакллантириш ишлари олиб борилмоқда.
Ёшлар орасида рақамли саводхонликни тарғиб қилиш ҳамда компьютер дастурлаш ва IT-соҳасига кенг жалб қилиш мақсадида “Бир миллион дастурчи” лойиҳаси жорий қилинди ва ушбу лойиҳа доирасида ёшларга дастурлаш тилларини ўргатиш ишлари амалга оширилди. “Бир миллион дастурчи” лойиҳаси доирасида 2021—2022 йилларда ёшларни компьютер дастурлашга қизиқадиган ёшларни аниқлаш, ўқитиш ва иш билан таъминлашга қаратилган комплекс чора-тадбирлар дастури тасдиқланди. Ҳозирда “Бир миллион дастурчи” лойиҳа доирасида 2,5 миллион нафардан ортиқ фойдаланувчи рўйхатдан ўтган. Шундан 1,7 миллион нафардан ортиқ иштирокчи лойиҳа доирасида таълим олиб, битирувчи сертификатларни қўлга киритган.
Шунингдек, “Бир миллион дастурчи” доирасида ва IT-Паркнинг таълим резидентларида IT сертификатни қўлга киритган ёшларга компьютер хариди учун 8,2 миллион сўм миқдоридаги имтиёзли кредит уларнинг шахсий пластик картасига ўтказиб бериши тартиби йўлга қўйилди.
“Бир миллион дастурчи” лойиҳасини мантиқий кейинги босқичини амалга ошириш мақсадида узбекcодерс платформаси орқали Coursera онлайн курсларида ёшлар учун таълим олиш имконияти яратилди.
2023—2024 йилларда платформанинг барча контентларидан фойдаланиш имкониятини берувчи 10 минг дона профессионал курслар учун лицензиялар олинади, 2023—2025 йиллар давомида 1,2 миллион ёшлар 8 та йўналиш бўйича онлайн курсларда бепул ўқитилади.
Изоҳ (0)