Koreya kompaniyasi Farg‘ona viloyatida golf maydoni barpo etishni rejalashtirmoqda. Bu haqda viloyat hokimligi axborot xizmati xabar berdi.
Xabarga ko‘ra, viloyat hokimi Xayrullo Bozorov Koreyaning Dream Build Team kompaniyasi rahbari Pak Yong Shik hamda Incense Korea kompaniyasi rahbari Yu Li Bokni qabul qildi. Uchrashuvda Farg‘ona viloyatida to‘g‘ridan to‘g‘ri Koreya sarmoyalari hisobiga amalga oshirish rejalashtirilayotgan investitsion loyihalar, turizm va boshqa sohalarda hamkorlik istiqbollari muhokama qilindi, Ekoshahar majmuasining tegishli kichik sanoat zonasi hududida “Koreys ishlab chiqaruvchilari sanoat parki” tashkil etish bo‘yicha ishlarning borishi ham uchrashuv asosiy kun tartibidan o‘rin oldi.
Dream Build Team kompaniyasi Quva tumani hududida golf maydoni tashkil etish loyihasini ishlab chiqmoqda. Viloyat hokimi Xayrullo Bozorov boshchiligidagi Farg‘ona delegatsiyasining joriy yil mart oyida Koreyaga tashrifi davomida bu borada muzokaralar o‘tkazilgandi. Loyihani istiqbolini hamda viloyatdagi infratuzilmalarni yuqori baholagan Pak Yong Shik, O‘zbekistondagi ikkinchi golf maydonining barpo etilishi Farg‘onaga Koreyadan, shuningdek, boshqa xorijiy davlatlardan, Yevropadan ko‘plab golf ishqibozlarini jalb etishiga ishonch bildirdi. Dream Build Team kompaniyasi rahbari bilan shuningdek, Ekoshahar hududida biznes markazi barpo etish loyihasi bo‘yicha muhokamalar o‘tkazildi.
Incense Korea kompaniyasi rahbari Yu Li Bok boshchiligidagi o‘nlab investorlardan iborat guruh, mart oyidagi viloyat delegatsiyasining Koreyaga tashrifi ortidan aprel oyida Farg‘onaga kelib, viloyatimizning iqtisodiy salohiyati bilan joyida tanishishgandi hamda Ekoshahar majmuasining tegishli kichik sanoat zonasi hududida “Koreys ishlab chiqaruvchilari sanoat parki” tashkil etish bo‘yicha dastlabki kelishuvlarga erishilgandi. Bugungi uchrashuvda Yu Li Bok ushbu sanoat parkida joylashtirish ko‘zda tutilayotgan investitsion loyihalarni ishlab chiqilayotgani haqida viloyat rahbariga ma’lumot berdi.
Shuningdek, Incense Korea kompaniyasi tomonidan Toshkent—Farg‘ona avtomagistral yo‘li bo‘yida Koreya standartlariga mos savdo, mehmonxona, ovqatlanish va logistika xizmatlarini o‘z ichiga olgan ko‘p tarmoqli xizmat ko‘rsatish markazi barpo etish loyihasi taqdim etildi. Viloyat rahbari xizmatlar sohasini rivojlantirishga yangicha yondashuvlarni joriy etish ustuvor maqsad ekanini qayd etib, ushbu loyiha har tomonlama qo‘llab-quvvatlanishini bildirdi.
Uchrashuvda shuningdek, misni chuqur qayta ishlash, pulli yo‘llar qurish, turistik obyektlar barpo etish loyihalari bo‘yicha investitsion hamkorlik bo‘yicha fikr almashildi, ta’lim sohasida hamkorlik bo‘yicha qo‘shma loyihalarni amalga oshirishda koreyalik investorlarning ijtimoiy hamkorligi bo‘yicha kelishib olindi.
Izoh (0)