Ijtimoiy tarmoqlarda komik rollari bilan tanilgan aktrisa Dilnavoz Ismatullayeva “Daryo”ning YouTube’dagi kanaliga bergan intervyusida nega yaqinlari sanʼatkor bo‘lishiga qarshi bo‘lishgani haqida so‘zlab berdi.
— Samarqand viloyatining Kattaqo‘rg‘on tumanidagi o‘rtahol oilada tug‘ilganman. Oilamda sanʼatkorlar bo‘lmasa ham, bolalikdan raqsga juda qiziqqanman. Maktab tadbirlarida raqs tushishni yaxshi ko‘rardim. Ammo akamning qarshiligi sabab raqs to‘garagiga qatnasholmaganman. Yaqinlarimning qistovi bilan maktabni tamomlab, bank kollejiga hujjat topshirganman. Kollejda bir oy o‘qib, keyin “O‘qishni istamayman”, deb darslarga bormay qo‘yganman. Bir yilga yaqin uyda o‘tirib, keyin onamni sanʼat kollejida o‘qishimga ruxsat berishga ko‘ndirganman. Boshqa chora yo‘qligini bilgandan keyin sanʼat kollejida o‘qishimga rozi bo‘lishgan. “Xoreografiya bo‘limida o‘qiyman”, deganimda onam drama bo‘limida o‘qishimni istagan. Sanʼat kollejiga hujjat topshirganimni bilgandan keyin akam rosa janjal qilgan. “Sen hali artist bo‘lasanmi?” deb yuzimga choynak-piyolalarni otgan.
Qarindoshlarimizning qizlari o‘qishmasdi, u paytlari qiz bola maktabni bitirishi bilan turmushga berib yuborishardi. Shu boisdan kollejga kirganim amakilarimga ham yoqmagan. Ular ham qattiq qarshilik qilishgan. Katta amakim shu darajada qattiqqo‘l ediki, agar maktabga kaltaroq kiyib borganimni eshitsa, traktorini haydab uyga mendan avval kelib, dakki berardi. Sanʼatga nisbatan bo‘lgan taqiqlardan bezor bo‘lib “Kun kelib zo‘r aktrisa ham bo‘laman, oilam ham bo‘ladi”, deb niyat qilgandim. Hozir hammalari kasbimni hurmat qilishadi, hatto men o‘qigandan keyin amakilarim ham qizlarini institutga o‘qishga kiritishdi. O‘sha paytda qarshiliklardan ranjiganman, ammo hozir hammasi yaxshilikka bo‘lgan ekan, deyman, — deydi aktrisa Dilnavoz Ismatullayeva.
Aktrisa nega “Million” jamoasidagi faoliyati uzoqqa cho‘zilmagani va qaynonasi uning rollariga qanday munosabat bildirgani haqida so‘zlab berdi.
— “Million” jamoasiga kelishimga kursdoshim Feruza Normatova sababchi bo‘lgan. 2019-yili jamoaga qo‘shilib, rollar ijro etishni boshlaganman. Komediyani yoqtirganim uchun Feruzaning taklifidan juda quvonganman. Ammo oilali bo‘lgandan keyin baribir yaqinlar bilan hisoblashish kerak. Qaynonamga aytganimda “Yaxshi taklif-ku, albatta boring”, deb qo‘llab-quvvatlagan. “Million”ning uchta konsertida ishtirok etganman. Ammo jamoaning tayyorgarlik jarayonlari kechki payt boshlanib, to tongga qadar davom etishi biroz qiyinchilik tug‘dirgan. Chunki bolalarim hali yosh, oilali ayolga bu tartibda ishlash qiyin. Shu bois jamoadan ketishga qaror qildim, — deydi Dilnavoz Ismatullayeva.
Aktrisa “Tungi reyd” sahnasidagi rolidan uyalmasligi va yaqinlari ham unga eʼtiroz bildirmagani haqida aytib o‘tdi.
— Hayotda hazil qilishsa, boshqa gap. Ammo kasbimiz shuni taqozo qilgandan keyin sahnadagi rollarni uyalmay ijro etish kerak. Menga rolning katta-kichikligi ahamiyatsiz. Muhimi, u tomoshabinning yodida qolishi kerak, deb hisoblayman. Ustozlarim ham sahnada xunuk bo‘lishdan qo‘rqmaslik kerak, deb uqtirishgan. Shu bois sahnada o‘zimni chiroyli ko‘rsatishga intilmayman, — deydi aktrisa Dilnavoz Ismatullayeva.
Suhbatni to‘liq holda quyida tomosha qilishingiz mumkin.
Izoh (0)