Ижтимоий тармоқларда комик роллари билан танилган актриса Дилнавоз Исматуллаева “Дарё”нинг YouTube’даги каналига берган интервьюсида нега яқинлари санъаткор бўлишига қарши бўлишгани ҳақида сўзлаб берди.
— Самарқанд вилоятининг Каттақўрғон туманидаги ўртаҳол оилада туғилганман. Оиламда санъаткорлар бўлмаса ҳам, болаликдан рақсга жуда қизиққанман. Мактаб тадбирларида рақс тушишни яхши кўрардим. Аммо акамнинг қаршилиги сабаб рақс тўгарагига қатнашолмаганман. Яқинларимнинг қистови билан мактабни тамомлаб, банк коллежига ҳужжат топширганман. Коллежда бир ой ўқиб, кейин “Ўқишни истамайман”, деб дарсларга бормай қўйганман. Бир йилга яқин уйда ўтириб, кейин онамни санъат коллежида ўқишимга рухсат беришга кўндирганман. Бошқа чора йўқлигини билгандан кейин санъат коллежида ўқишимга рози бўлишган. “Хореография бўлимида ўқийман”, деганимда онам драма бўлимида ўқишимни истаган. Санъат коллежига ҳужжат топширганимни билгандан кейин акам роса жанжал қилган. “Сен ҳали артист бўласанми?” деб юзимга чойнак-пиёлаларни отган.
Қариндошларимизнинг қизлари ўқишмасди, у пайтлари қиз бола мактабни битириши билан турмушга бериб юборишарди. Шу боисдан коллежга кирганим амакиларимга ҳам ёқмаган. Улар ҳам қаттиқ қаршилик қилишган. Катта амаким шу даражада қаттиққўл эдики, агар мактабга калтароқ кийиб борганимни эшица, тракторини ҳайдаб уйга мендан аввал келиб, дакки берарди. Санъатга нисбатан бўлган тақиқлардан безор бўлиб “Кун келиб зўр актриса ҳам бўламан, оилам ҳам бўлади”, деб ният қилгандим. Ҳозир ҳаммалари касбимни ҳурмат қилишади, ҳатто мен ўқигандан кейин амакиларим ҳам қизларини институтга ўқишга киритишди. Ўша пайтда қаршиликлардан ранжиганман, аммо ҳозир ҳаммаси яхшиликка бўлган экан, дейман, — дейди актриса Дилнавоз Исматуллаева.
Актриса нега “Миллион” жамоасидаги фаолияти узоққа чўзилмагани ва қайнонаси унинг ролларига қандай муносабат билдиргани ҳақида сўзлаб берди.
— “Миллион” жамоасига келишимга курсдошим Феруза Норматова сабабчи бўлган. 2019 йили жамоага қўшилиб, роллар ижро этишни бошлаганман. Комедияни ёқтирганим учун Ферузанинг таклифидан жуда қувонганман. Аммо оилали бўлгандан кейин барибир яқинлар билан ҳисоблашиш керак. Қайнонамга айтганимда “Яхши таклиф-ку, албатта боринг”, деб қўллаб-қувватлаган. “Миллион”нинг учта концертида иштирок этганман. Аммо жамоанинг тайёргарлик жараёнлари кечки пайт бошланиб, то тонгга қадар давом этиши бир оз қийинчилик туғдирган. Чунки болаларим ҳали ёш, оилали аёлга бу тартибда ишлаш қийин. Шу боис жамоадан кетишга қарор қилдим, — дейди Дилнавоз Исматуллаева.
Актриса “Тунги рейд” саҳнасидаги ролидан уялмаслиги ва яқинлари ҳам унга эътироз билдирмагани ҳақида айтиб ўтди.
— Ҳаётда ҳазил қилишса, бошқа гап. Аммо касбимиз шуни тақозо қилгандан кейин саҳнадаги ролларни уялмай ижро этиш керак. Менга ролнинг катта-кичиклиги аҳамиятсиз. Муҳими, у томошабиннинг ёдида қолиши керак, деб ҳисоблайман. Устозларим ҳам саҳнада хунук бўлишдан қўрқмаслик керак, деб уқтиришган. Шу боис саҳнада ўзимни чиройли кўрсатишга интилмайман, — дейди актриса Дилнавоз Исматуллаева.
Суҳбатни тўлиқ ҳолда қуйида томоша қилишингиз мумкин.
Изоҳ (0)