Vladimir Putin Pekinda Si Szinpin bilan uchrashdi

Rossiya prezidenti Vladimir Putin bugun, 17-oktyabr kuni “Bir kamar, bir yo‘l” forumida ishtirok etish uchun Pekinga yetib keldi. 

Forum oldidan Putin Xitoy rahbari Si Szinpin bilan uchrashdi. Davlat rahbarlari birgalikda suratga tushishdi.

Kecha Xitoy mediakorporatsiyasiga bergan intervyusida Putin Xitoy rahbari haqida ancha iliq fikrlarni bildirib o‘tdi.

“Si Szinpin meni do‘stim, deb ataydi, men ham uni do‘stim deb bilaman. Xalqimizda do‘sting kimligini aytsang, men sening kimligingni aytaman, degan gap bor”, — dedi Putin.

Uning ta’kidlashicha, Xitoy Xalq Respublikasi raisi “puxta, xotirjam, ishbilarmon va ishonchli hamkor”. Putinning, “agar biz u bilan biror narsa bo‘yicha kelishib olsak, kelishuvlarimiz har ikki tomonda ham amalga oshishiga ishonch hosil qilishimiz mumkin”, dedi.

Shuningdek, Putin Xitoyning Rossiya va Ukraina o‘rtasidagi ziddiyatni hal qilish bo‘yicha takliflarini yuqori baholagan holda, hozircha ularni amalga oshirib bo‘lmasligini aytib o‘tdi.

“Menimcha, bu takliflar juda realdir, har qanday holatda ham ular tinchlik bitimlari uchun asos bo‘lishi mumkin. Ammo, afsuski, narigi tomon hech qanday muzokaralar olib borishni istamayapti”, — dedi Putin.