Россия президенти Владимир Путин бугун, 17 октябрь куни “Бир камар, бир йўл” форумида иштирок этиш учун Пекинга етиб келди.
Форум олдидан Путин Хитой раҳбари Си Цзиньпин билан учрашди. Давлат раҳбарлари биргаликда суратга тушишди.
Кеча Хитой медиакорпорациясига берган интервьюсида Путин Хитой раҳбари ҳақида анча илиқ фикрларни билдириб ўтди.
“Си Цзиньпин мени дўстим, деб атайди, мен ҳам уни дўстим деб биламан. Халқимизда дўстинг кимлигини айтсанг, мен сенинг кимлигингни айтаман, деган гап бор”, — деди Путин.
Унинг таъкидлашича, Хитой Халқ Республикаси раиси “пухта, хотиржам, ишбилармон ва ишончли ҳамкор”. Путиннинг, “агар биз у билан бирор нарса бўйича келишиб олсак, келишувларимиз ҳар икки томонда ҳам амалга ошишига ишонч ҳосил қилишимиз мумкин”, деди.
Шунингдек, Путин Хитойнинг Россия ва Украина ўртасидаги зиддиятни ҳал қилиш бўйича таклифларини юқори баҳолаган ҳолда, ҳозирча уларни амалга ошириб бўлмаслигини айтиб ўтди.
“Менимча, бу таклифлар жуда реалдир, ҳар қандай ҳолатда ҳам улар тинчлик битимлари учун асос бўлиши мумкин. Аммо, афсуски, нариги томон ҳеч қандай музокаралар олиб боришни истамаяпти”, — деди Путин.
Изоҳ (0)