Fransiya sobiq prezidenti Nikolya Sarkoziga o‘zining saylovoldi kampaniyasi uchun Liviya hukumatidan “pul olganlik ishi” bo‘yicha yangi ayblovlar qo‘yildi.
Manbalarga ko‘ra, bu safar sobiq davlat rahbariga ikki xil ayblov qo‘yilgan: o‘ziga qarshi tergov jarayonida guvohga pora berganlik va “uyushgan guruh tomonidan firibgarlik sodir qilish uchun jinoiy til biriktirganlik”.
Sarkozi 3-oktyabrdan beri Parij sudida so‘roq qilinmoqda va unga ayblov qo‘yilgani yangi sud mahkamasi bo‘lishini anglatadi.
Gap shundaki, Sarkozining prezidentlik kampaniyasi Liviya tomonidan moliyalashtirilgani ishi bo‘yicha vositachi Ziyod Taqyiddin o‘z ko‘rsatmalaridan qaytgan. Endi Sarkozi guvohga bosim o‘tkazganlikda gumon qilinmoqda, biroq bu ishda aybini tan olmayapti.
2016-yilda Ziyod Taqyiddin 2006-yil oxiri va 2007-yil boshida Liviyadan Fransiyaga 5 million yevro naqd pul solingan jomadonlarni yetkazib berganini aytgan. Ikki marta u Sarkozi ma’muriyati rahbari Klod Guenaga va bir marta shaxsan sobiq prezidentga pul berganini ta’kidlagan.
May oyida Parij appelyatsiya sudi sobiq prezident Nikolya Sarkozini “telefon suhbatlarini tinglash ishi” bo‘yicha bir yillik qamoq jazosiga hukm qilgandi.
Sarkozi allaqachon jazoni o‘tagan
Eslatib o‘tamiz, 2021-yilda Fransiyaning sobiq prezidenti 2012-yilda bo‘lib o‘tgan saylovoldi kampaniyasini noqonuniy moliyalashtirganlikda aybdor deb topilgandi. Ayblovga ko‘ra, sobiq prezident ortiqcha xarajatlarni yashirish uchun soxta bank hisobraqamlaridan foydalangan.
Sarkozining aybi jinoiy harakatlar sodir etilgan vaqtda davlat rahbari bo‘lgani bilan og‘irlashgan. Uning o‘zi ham unga qo‘yilgan ayblovlar asossiz ekanini bir necha bor taʼkidlagan. Keyin Sarkozi bir yil qamoq jazosiga hukm qilingan va jazoni uy qamog‘ida o‘tagan.
Izoh (0)