Франция собиқ президенти Николя Саркозига ўзининг сайловолди кампанияси учун Ливия ҳукуматидан “пул олганлик иши” бўйича янги айбловлар қўйилди.
Манбаларга кўра, бу сафар собиқ давлат раҳбарига икки хил айблов қўйилган: ўзига қарши тергов жараёнида гувоҳга пора берганлик ва “уюшган гуруҳ томонидан фирибгарлик содир қилиш учун жиноий тил бириктирганлик”.
Саркози 3-октябрдан бери Париж судида сўроқ қилинмоқда ва унга айблов қўйилгани янги суд маҳкамаси бўлишини англатади.
Гап шундаки, Саркозининг президентлик кампанияси Ливия томонидан молиялаштирилгани иши бўйича воситачи Зиёд Тақйиддин ўз кўрсатмаларидан қайтган. Энди Саркози гувоҳга босим ўтказганликда гумон қилинмоқда, бироқ бу ишда айбини тан олмаяпти.
2016 йилда Зиёд Тақйиддин 2006 йил охири ва 2007 йил бошида Ливиядан Францияга 5 миллион евро нақд пул солинган жомадонларни етказиб берганини айтган. Икки марта у Саркози маъмурияти раҳбари Клод Гуэнага ва бир марта шахсан собиқ президентга пул берганини таъкидлаган.
Май ойида Париж аппеляция суди собиқ президент Николя Саркозини “телефон суҳбатларини тинглаш иши” бўйича бир йиллик қамоқ жазосига ҳукм қилганди.
Саркози аллақачон жазони ўтаган
Эслатиб ўтамиз, 2021 йилда Франциянинг собиқ президенти 2012 йилда бўлиб ўтган сайловолди кампаниясини ноқонуний молиялаштирганликда айбдор деб топилганди. Айбловга кўра, собиқ президент ортиқча харажатларни яшириш учун сохта банк ҳисобрақамларидан фойдаланган.
Саркозининг айби жиноий ҳаракатлар содир этилган вақтда давлат раҳбари бўлгани билан оғирлашган. Унинг ўзи ҳам унга қўйилган айбловлар асоссиз эканини бир неча бор таъкидлаган. Кейин Саркози бир йил қамоқ жазосига ҳукм қилинган ва жазони уй қамоғида ўтаган.
Изоҳ (0)