Тошкент ҳалқа автомобиль йўлининг Юнусобод тумани Боғишамол кўчаси ҳудудига тўғри келувчи Республика перинатал маркази, Бўзсув ва Салор каналлари ҳудуди ахлатга тўлиб кетган, туғуруқхона атрофи эса юк машиналари турадиган жойга айлантириб юборилган. Бу ҳақда “UzReport” телеканалида маълум қилинди.
Айтилишича, Бўзсув ва Салор каналлари жуда ачинарли ҳолатда. Каналлар на ўт-ўланлардан, на чиқиндилардан тозаланган, атрофи қаровсиз ва ахлатхонага айланиб қолган. Ҳолбуки маҳаллий аҳолининг эслашича, бу ерлар 10 йилча аввал ям-яшил даҳа эди. Ҳозир эса дарахтлар кесилган, унинг ўрнини эса баҳайбат юк машиналари эгаллаган.
Масалан, Университет кўчасидан Салор каналигача пиёдалар йўлаги йўқ эканлиги боис йўловчилар машина йўлининг бир қисмидан юришга мажбур. Бу эса аҳоли хавфсизлигига ҳам, йўл тартиб-қоидасига ҳам мутлақо тўғри келмайди.
Шу йўлнинг қарама-қарши томони — Тошкент педиатрия тиббиёт институти клиникасига элтувчи йўл қурилиш учун мўлжалланган оғир машиналар турар жойига айлантирилган. Юк машиналарнинг турар жойи бўлмаган бу ҳудуднинг эндиликда банд этилгани пиёдалар ва талабаларга ноқулайлик туғдирмоқда. Ачинарлиси, бу майдон қачонлардир сўлим хиёбон бўлган ва афсуски, бугунги кунга келиб дарахтлар кесилган ҳамда ҳудуд бетонлаб ташланган.
Ноқулайликлар ҳамда атроф-муҳитнинг тобора қараб бўлмас аҳволга айланиб бораётгани маҳаллий аҳоли, шунингдек, институт талабаларининг норозилигига ҳам сабаб бўлмоқда. Талабаларнинг айтишича, ҳозирда йўллар тирбанд, пиёдалар йўлаги йўқ, бори ҳам таъмирталаб. Ёғин-сочинли кунларда ҳаракатланиш жуда катта қийинчилик туғдиради.
Мазкур ҳудудни обод қилиш учун талабалар йўл четига дарахт ва гуллар экилиши юзасидан масъулларга таклиф билан чиқишмоқда. Бироқ бундай таклифлар жавобсиз қолган.
Аҳоли вакиллари ҳамда университет маъмурияти йўл инфратузилмаси билан боғлиқ муаммолар яқин орада тартибга келтирилишига умид қилмоқда.
Изоҳ (0)