Italiyada mafiyaga tegishli qariyb 100 million yevrolik mol-mulk musodara qilindi

Italiya Moliyaviy gvardiyasi 6-oktyabr juma kuni Sitsiliyadagi mafiya guruhining 98 million yevrolik aktivlari va mulklarini musodara qildi.

Sitsiliyaning turli provinsiyalari, Lombardiya mintaqasi, Veneto va poytaxt Latsioda o‘tkazilgan operatsiyada 50 nafar Moliyaviy gvardiya xodimlari ishtirok etmoqda.

Aktivlar Sitsiliyaning Kataniya provinsiyasida 2021-yildan beri hibsda saqlanayotgan Siverino familiyali ota va o‘g‘ilga tegishli. Ularning mafiya faoliyatida ayblanganlik bo‘yicha ishi sudga yuborilgan.

Mazkur oila mahalliy jinoiy klanlardan birining “xazinasini” to‘ldirish va klan a’zolariga “barqaror va uzoq muddatli” yordam ko‘rsatish orqali ularni doimiy ravishda qo‘llab-quvvatlagan. Ushbu yordam evaziga Siverinolar oilasi “himoya va tadbirkorlik faoliyatini kengaytirishda yordam” olganlar, deyiladi Moliyaviy gvardiya xabarida.

Siverinolarga tegishli 70 ta ko‘chmas mulk obyekti, 1,7 million yevrolik naqd pul, 250 ming yevrodan ortiq zargarlik buyumlari va qimmatbaho jihozlar, 16 million yevrolik bank, moliyaviy, shaxsiy va korporativ aktivlar musodara qilindi.