Kanadada chekish xavfi haqida ogohlantirishlar endi sigareta donalarining har biri ustiga bosib chiqariladi, deb e’lon qildi mamlakat hukumati. Kanada bunday amaliyotni qo‘llaydigan dunyodagi birinchi davlat bo‘ladi.
“Yangi qoidalar Kanada hukumatining chekuvchilarga bu odatni tashlashga yordam berish, yoshlarni va tamaki iste’mol qilmaydiganlarni nikotin zararidan himoya qilish va tamakining jozibadorligini yanada kamaytirishga qaratilgan sa’y-harakatlarining bir qismidir”, — deyiladi hukumat xabarida.
Yangi qoidalar 2023-yilning 1-avgustidan kuchga kiradi va bosqichma-bosqich joriy etiladi: ogohlantirishlar 2024-yil aprel oyining oxirida tamaki mahsulotlarida paydo bo‘ladi, iyul oyiga qadar katta o‘lchamli sigaretalarga, 2025-yilning apreliga qadar esa oddiy sigaretalarga bosiladi.
Sigaretada qanday yozuvlar bo‘lishiga misollar ko‘rsatildi.
- “Tamaki tutuni bolalar uchun zararli”;
- “Sigaretalar saratonga olib keladi”;
- “Har tortishda zahar bor”.
2022-yil oxirida Yangi Zelandiya hukumati 2009-yil 1-yanvar kuni va undan keyin tug‘ilgan barcha fuqarolarga tamaki mahsulotlarini sotishni umrbod taqiqlagan edi. Yangi Zelandiya hukumati davlatni 2025-yilgacha “chekishdan xoli” mamlakatga aylantirishga intilmoqda.
Izoh (0)