AQSH prezidenti Jo Bayden Rossiya yetakchisi Vladimir Putinni diktator deb atadi hamda keyingi saylovlardagi ehtimoliy raqibi Donald Trampning siyosiy qarashlariga izoh berdi. Bu haqda Reuters yozmoqda.
“Men Putin kabi diktatorlar tarafida bo‘lmayman. Balki Tramp va uning MAGA dagi (Make America Great Again) do‘stlari unga qulluq qilishar, lekin men bunday qilmayman”, — dedi Bayden o‘z tarafdorlari bilan uchrashuvda.
AQSH prezidentining aytishicha, Tramp Amerika demokratiyasini yo‘q qilishga kirishayotgan paytda, ayrimlar Baydenning yoshiga haddan ortiq e’tibor berishmoqda.
Tramp agar prezident etib qayta saylansa, 24 soat ichida Ukrainadagi keng ko‘lamli janglarni to‘xtatishga bir necha bor va’da bergandi. Putin esa saylovlarda Trampning g‘alaba qozonishi AQSH bilan munosabatlarni o‘zgartirmasligini aytdi.
Eslatib o‘tamiz, Rossiyaning Ukrainaga bosqini boshlanganidan ko‘p o‘tmay, 2022-yil 17-mart kuni Jo Bayden Vladimir Putinni “qonli diktator va Ukraina xalqiga qarshi axloqsiz urush olib borayotgan haqiqiy kallakesar” deb atagan. Undan avval, 16-mart kuni esa Bayden Rossiya prezidentini harbiy jinoyatchi deb atagandi. Rossiya prezidentining matbuot kotibi Dmitriy Peskov AQSH davlat rahbarining “Putinni harbiy jinoyatchi” deb atagan bayonoti “o‘rinsiz va kechirib bo‘lmaydigan nutqdan” boshqa narsa emasligini aytgan.
Izoh (0)