Тошкентда киберхавфсизлик бўйича ўқув ва илмий-тадқиқот маркази ташкил этилади

Тошкентда киберхавфсизлик бўйича ўқув ва илмий-тадқиқот марказини ташкил этилади. Бу ҳақда “Дунё” агентлиги хабар берди.

Тошкент халқаро Вестминстер университети ректори Баҳром Мирқосимов Малайзиянинг Осиё ва Тинч океани технология ва инновациялар университети ректори Хо Чин Куан билан музокара ўтказди. Музокаралар натижасида икки университет ўртасида Ҳамкорлик меморандуми имзоланди.

Осиё ва Тинч океани технология ва инновациялар университети (Asia Pacific University оf Technology & Innovation – ARUУ) 1993 йилда ташкил этилган. Малайзия рақамли иқтисодиёт корпорациясининг рақамли технологияларга ихтисослашган етакчи университет мақомига сазовор бўлган. QS Rankings халқаро рейтинги бўйича дунёнинг етакчи 700 университети рўйхатидан ўрин олган. Университет ҳузурида саноатда сунъий интеллектни қўллаш, робототехника, киберхавфсизлик, креатив индустрия, Internet of Things (IoT) технологияларини ривожлантириш бўйича илмий марказлар фаолият юритади.

Тошкент халқаро Вестминстер университети ректори ташриф давомида, шунингдек, Taylor’s University, UОW Malaysia, INTI International University каби етакчи олий таълим муассасалари раҳбарлари билан ҳам ҳамкорлик истиқболларини муҳокама қилган.

Ўтказилган учрашувлар натижасида ўқитувчилар малакасини ошириш ва талабалар алмашинувини йўлга қўйиш, ижодий иқтисодиёт ва киберхавфсизлик бўйича Куала-Лумпур “Ёзги мактаб” дастурларини йўлга қўйиш, Тошкентда киберхавфсизлик бўйича ўқув ва илмий-тадқиқот марказини ташкил қилиш бўйича келишувга эришилди.

Ўзбекистонда кибержиноятчилик

Мамлакатда 2020 йилда ахборот технологиялари соҳасида 106 та жиноят қайд этилган. 2021 йилда бу кўрсаткич 2 281 тани, 2022 йилда эса бир йил аввалгидан икки баравар, 2 йил аввалгидан 40 баравар кўпайиб, 4 332 тани ташкил этган. Йил давомида қайд этилган ҳолатларнинг 3 372 таси ёки 82 фоизини банк пластик карталардан пул маблағларни талон-торож қилиш билан боғлиқ жиноятлардир.