21-sentabr, chorshanba kuni Nyu-Yorkda bo‘lib o‘tgan Birlashgan Millatlar Tashkiloti (BMT) Bosh assambleyasida 67 davlat BMTning Jahon okeanlarini himoya qilish bo‘yicha yangi konvensiyasini imzoladi.
“Konvensiyani imzolash orqali biz okeanlarni inson bosimidan himoya qilishimiz hamda 2030-yilgacha sayyoramizning kamida 30 foizini asrash maqsadimizga bir qadam yaqinlashishimiz mumkin”, — dedi Yevropa Ittifoqining atrof-muhit bo‘yicha komissari Virginiyus Sinkevichus.
U hujjatni “okeanlar uchun konstitutsiya” deb atadi. Kelishuv kuchga kirishi uchun davlatlar tomonidan milliy darajada ratifikatsiya qilinishi kerak.
Qariyb 15 yil davomida muhokama qilingan Dengiz bioxilma-xilligini himoya qilish bo‘yicha global pakt 2023-yil mart oyida kelishilgan va iyun oyida BMT tomonidan rasman qabul qilingan. Bu o‘tgan yili kelishilgan 2030-yilgacha dunyo yer va suvlarining 30 foizini (“30 gacha 30”) himoya qilish maqsadiga erishish uchun muhim vosita sifatida qaralmoqda. So‘nggi yillarda havo haroratining ko‘tarilishi va cheklanmagan baliq ovlari tufayli dunyo okeaniga tahdidlar kuchaygan. Okeanlarning karbonat angidridni singdirish qobiliyatini oshiradigan dengiz tubini qazish va geoinjeneriya texnologiyalari yangi tahdidlar keltirib chiqarishi mumkin.
“30 gacha 30” maqsadiga erishish uchun atrof-muhitni muhofaza qilish guruhlari kelishuv 2025-yilgacha to‘liq amalga oshirilishi kerakligini bildirdi.
“Okean kuta olmaydi va kelishuv deyarli 20 yil davomida tuzilganini hisobga olsak, vaqtni behuda sarflashga hojat yo‘q”, — dedi Butunjahon tabiatni muhofaza qilish jamg‘armasining dengiz ishlari bo‘yicha eksperti Jessika Bettl.
O‘z navbatida, Butunjahon tabiatni muhofaza qilish ittifoqi (IUCN) hisob-kitoblariga ko‘ra, kelishuvni amalga oshirishni boshlash uchun 500 million dollar, amalga oshirish va rivojlantirish uchun maxsus fond yaratishga esa yiliga yana 100 million dollar kerak bo‘lishi mumkin.
Izoh (0)