Farg‘ona viloyatida 1,5 milliard so‘mlik uyali aloqa vositalarini yashirincha olib kirish rejasi fosh etildi, deb xabar beradi viloyat Bojxona boshqarmasi matbuot xizmati.
Farg‘ona viloyati bojxona boshqarmasi Kontrabandaga qarshi kurashish bo‘limi xodimlari tomonidan olingan maʼlumot asosida viloyat DXX va IIB xodimlari bilan hamkorlikda tezkor tadbir o‘tkazilgan. Tadbirda Farg‘ona—Toshkent yo‘nalishida harakatlanayotgan fuqaro boshqaruvidagi Kia Bongo rusumli avtotransport vositasi Namangan viloyatiga kirish yo‘l patrul xizmati maskanida to‘xtatilib, ko‘zdan kechirilgan.
Natijada, avtomashinaning yukxonasida maxsus yasalgan bo‘lmaga joylashtirilgan xorijda ishlab chiqarilgan va bojxona rasmiylashtiruvidan o‘tganligini tasdiqlovchi hujjatlari bo‘lmagan, dastlabki umumiy qiymati 1 milliard 501 million so‘mlik yetti turdagi jami 420 dona uyali aloqa vositalari borligi aniqlangan.
Mazkur holat yuzasidan tergovga qadar tekshiruv harakatlari olib borilmoqda.
Eslatib o‘tamiz, 2022-yilda DXX Namangan, Farg‘ona va Toshkent viloyatlarida 2,4 milliard so‘mlik noqonuniy tovarlar kontrabandasiga chek qo‘ygani, farg‘onalik fuqaro xonadonida qiymati 60 million so‘m bo‘lgan 355 dona telefon noqonuniy saqlab kelinayotgani aniqlangani to‘g‘risida xabar berilgandi.
Izoh (0)