“Noto‘g‘ri talqin qilinmoqda” — bosh vazir matbuot kotibi Rossiyaning O‘zbekistonda maktab qurish taklifi haqida

Moskva shahrida O‘zbekiston va Rossiya hukumat rahbarlari darajasidagi Qo‘shma komissiyaning 4-majlisi bo‘lib o‘tdi. Uchrashuvda Rossiya bosh vaziri Mixail Mishustin Rossiya tomoni O‘zbekistonda rus tilida va Rossiya dasturlari asosida ta’lim beriladigan bir nechta maktab qurishga tayyorligini bildirgan. Bosh vazir Abdulla Aripovning matbuot kotibi Qo‘shma komissiya majlisida madaniy-gumanitar yo‘nalishdagi hamkorlik bo‘yicha bildirilgan muayyan taklif mohiyatini noto‘g‘ri talqin qilmaslikka chaqirdi.

Bekzod Hidoyatov so‘zlariga ko‘ra, davlatlar o‘rtasidagi o‘zaro rasmiy kelishuvlarga asosan, bir davlat hisobidan boshqa davlat hududida maktab va shunga o‘xshash ijtimoiy obektlar qurish an’anasi jahon tajribasida mavjud. Bu o‘zaro ijtimoiy yordam sifatida tasniflanadi.

“Shuni alohida qayd etish lozimki, xorijiy mamlakatlar tomonidan qurib beriladigan  maktablarning ta’lim dasturlari dastlab soha mutaxasissislari tomonidan milliy urf-odat, qadriyat va an’analarimiz, tariximiz, amaldagi qonun hujjatlarimiz, mavjud ta’lim standartlarimiz nuqtayi nazaridan chuqur o‘rganib chiqiladi.

Agar qurib berilishi taklif etilgayotgan maktab va uning dasturi yuqorida nazarda tutilgan talablarga mazmunan mos kelsa, ushbu ta’lim muassasasining faoliyat yuritishi uchun o‘rnatilgan tartibda litsenziya beriladi”, — deyiladi munosabatda.

Matbuot kotib mazkur jihatlarni inobatga olgan holda, ijtimoiy tarmoq foydalanuvchilaridan asoslanmagan maʼlumotlarni tarqatmasliklarini so‘ragan.

O‘zbekiston bosh vaziri Abdulla Aripov Qo‘shma komissiya majlisida taklif mamnuniyat bilan qabul qilinishini aytgan edi.

“Ta’lim rus tilida olib boriladigan maktablar qurish taklifini katta mamnuniyat bilan qabul qilamiz. Shuni aytishni istardimki, O‘zbekistonda 10 mingdan ortiq umumta’lim maktablari bor, ularning 10 foizida rus tilida ta’lim beriladi”, — degan Aripov.

O‘zbekiston va Rossiya hukumatlari rahbarlari darajasidagi qo‘shma komissiyaning 3-majlisi 2022-yil dekabr oyida bo‘lib o‘tgandi. O‘shanda ikki mamlakat hukumatlari rahbarlari ikki davlat o‘rtasidagi o‘zaro hamkorlikni yanada rivojlantirishga qaratilgan o‘ndan ortiq hujjatni imzolagan.

Shavkat Mirziyoyevning Vladimir Putin bilan 2023-yil 9-avgust kuni o‘tkazilgan telefon orqali muloqotida O‘zbekiston bilan Rossiya o‘rtasidagi strategik sheriklik va ittifoqchilik munosabatlarini yanada rivojlantirish masalalari muhokama qilingan edi.