Фарғона вилоятида 1,5 миллиард сўмлик уяли алоқа воситаларини яширинча олиб кириш режаси фош этилди, деб хабар беради вилоят Божхона бошқармаси матбуот хизмати.
Фарғона вилояти божхона бошқармаси Контрабандага қарши курашиш бўлими ходимлари томонидан олинган маълумот асосида вилоят ДХХ ва ИИБ ходимлари билан ҳамкорликда тезкор тадбир ўтказилган. Тадбирда Фарғона—Тошкент йўналишида ҳаракатланаётган фуқаро бошқарувидаги Киа Бонго русумли автотранспорт воситаси Наманган вилоятига кириш йўл патрул хизмати масканида тўхтатилиб, кўздан кечирилган.
Натижада, автомашинанинг юкхонасида махсус ясалган бўлмага жойлаштирилган хорижда ишлаб чиқарилган ва божхона расмийлаштирувидан ўтганлигини тасдиқловчи ҳужжатлари бўлмаган, дастлабки умумий қиймати 1 миллиард 501 миллион сўмлик етти турдаги жами 420 дона уяли алоқа воситалари борлиги аниқланган.
Мазкур ҳолат юзасидан терговга қадар текширув ҳаракатлари олиб борилмоқда.
Эслатиб ўтамиз, 2022 йилда ДХХ Наманган, Фарғона ва Тошкент вилоятларида 2,4 миллиард сўмлик ноқонуний товарлар контрабандасига чек қўйгани, фарғоналик фуқаро хонадонида қиймати 60 миллион сўм бўлган 355 дона телефон ноқонуний сақлаб келинаётгани аниқлангани тўғрисида хабар берилганди.
Изоҳ (0)