Liviyada 11 ming odamni halok qilgan toshqinlar — sun’iy yo‘ldosh tasvirlarida (foto)

Liviyada suv toshqinlari oqibatida halok bo‘lganlar soni 11,3 ming kishiga yetdi. Bu haqda Liviya Qizil yarim Oy jamiyatiga tayanib, Associated Press xabar berdi.

Gumanitar tashkilotning qo‘shimcha qilishicha, yana 10 ming kishi bedarak yo‘qolgan deb hisoblanmoqda. Qidiruv ishlari davom etmoqda.

10-sentabr kuni kechasi Liviyada “Daniel” to‘foni sabab yirik suv toshqinlari kuzatildi. Yomg‘irlar sabab ikkita to‘g‘on vayron bo‘ldi, shaharlarni suv bosdi. Tabiiy ofatdan eng ko‘p Derna shahri jabr ko‘rdi, rasmiy maʼlumotlarga ko‘ra, u yerda 6 ming kishi bedarak yo‘qolgan. Suv oqimlari butun boshli mahallalarni O‘rta Yer dengiziga oqizib ketgan.

Al-Bayda va Susa ham falokatga uchradi.

Sun’iy yo‘ldosh tasvirlaridan Dernada sayozlikdan dengizgacha cho‘zilgan loy va qoldiqlarni ko‘rish mumkin. Qutqaruvchilarning aytishicha, dengizga oqqan ko‘plab jasadlarni suv oqimi qayta qirg‘oqqa chiqarib tashlagan.

Rasmiylar qurbonlar soni ortishidan xavotirda.

“Liviya Sog‘liqni saqlash vazirligi sharqda tabiiy ofat qurbonlari soni ortishini kutmoqda. Derna shahridagi vaziyat tobora ayanchli tus olmoqda. Qurbonlar soni bo‘yicha yakuniy statistik ma’lumotlar yo‘q”, — dedi vazirlik rahbari Usmon Abdulalil.

Siyosatchi falokatning dahshatli tafsilotlarini ham aytib berdi.

“Dernadagi vaziyat halokatli... Ko‘p joylarda haligacha jasadlar sochilib yotibdi. Hozircha ularni dafn etishning imkoni yo‘q”, — dedi u mahalliy Almasar telekanaliga.

Qizil yarim Oy vakili yordam so‘rab mamlakatlarga murojaat qildi.

“Bizga har qanday xalqaro hamkorlik kerak. Bizda to‘qqiz mingdan ortiq bedarak yo‘qolganlar haqida xabar bor. Kattaroq qidiruv ishlarini olib borish kerak”, — deydi u.

Rasmiylar, shuningdek, voqealarning dahshatli tus olishi oldindan prognoz qilinmagani sabablarini o‘rganmoqda.

“Ob-havo sharoiti to‘g‘ri o‘rganilmagan, dengiz suvi va yog‘ingarchilik darajasi, shamol tezligi o‘rganilmagan, bo‘ron yo‘lida qolgan oilalar evakuatsiya qilinmagan”, — deya tan oldi Liviya favqulodda vaziyatlar boshqarmasi va tez yordam xizmati rahbari Usama Ali.

Uning so‘zlariga ko‘ra, Liviya bunday falokatga tayyor emasdi.

“Liviya hech qachon bunday darajadagi falokatga duch kelmagan. Kamchiliklar borligini tan olamiz”, — deya qo‘shimcha qildi u.