Qashqadaryo viloyatining Yakkabog‘ tumanidagi maktabda o‘quvchilarga sinfxonada joy yetishmasligi, bitta partada uch nafar o‘quvchi o‘tirgani aytilgan videolar tarqaldi. Viloyat Maktabgacha va maktab ta’limi boshqarmasi ushbu holatga munosabat bildirdi.
Boshqarmaning yozishicha, Yakkabog‘ tumanidagi 4-umumiy o‘rta ta’lim maktabi 2023/2024-o‘quv yilida 1-sinfga 89 nafar o‘quvchini qabul qilgan.
Maktabdagi boshlang‘ich sinflar o‘qiydigan har bir sinfxonada 30 nafar o‘quvchi bor. Shu hisobdan 2023/2024-o‘quv yilida 1-sinfga keladigan 89 nafar bolalar 3 ta sinfga bo‘lib o‘qitilmoqda. Bugungi kunda ota-onalarning istagi bilan 9 nafar o‘quvchi ta’lim olish jarayonini boshqa maktabda davom ettirmoqda.
80 nafari esa shu maktabda ta’lim oladi. Maktab sinfxonalari loyiha asosida 30 nafarga mo‘ljallanganligi sababli 80 nafar o‘quvchilar uchun to‘rtinchi sinfni ochish talab etilmaydi, — deyiladi boshqarma axborotida.
Ta’kidlanishicha, maktabda 850 nafar o‘quvchi ikki smena asosida ta’lim olmoqda.
O‘quvchilarning barchasiga sinfxonalar hamda partalar yetarli ekanligini ma’lum qilamiz, — deydi mas’ullar.
Mazkur holat yuzasidan viloyat Maktabgacha va maktab ta’limi boshqamasi boshlig‘i Ubaydulla Oripov ham tushuntirish berdi.
Nafaqat bu maktabda, Yakkabog‘ tumanidagi mavjud barcha maktablarda sinfxonalar hamda partalar yetarli. Hatto keragidan ortiq. Bu masalada hech qanday muammo bo‘lishi mumkin emas. Hal etiladi, — degan boshqarma boshlig‘i.
Tarmoqlarda tarqalgan videoda ota-onalarning maktab direktori — Elbek Alimardonov bilan suhbati aks etgan bo‘lib, ular o‘quvchilarning uch nafardan o‘tirishidan norozi bo‘lishi va maktab direktoridan bu holat qachon bartaraf etilishini so‘rashi ko‘ringan. Maktab rahbari suhbatdosh ularning suhbatini telefonga tasvirga olayotgani uchun savollarga javob qaytarmay, muloqot joyini tark etgan.
Izoh (0)