Shavkat Mirziyoyev Tojikiston prezidenti Emomali Rahmonning taklifiga binoan 14-sentabr kuni amaliy tashrif bilan ushbu mamlakatga jo‘nab ketdi. Bu haqda Prezident matbuot xizmati xabar berdi.
Tashrif dasturiga muvofiq Dushanbe shahrida Markaziy Osiyo mamlakatlari yetakchilarining navbatdagi Maslahat uchrashuvi va Orolni qutqarish xalqaro jamg‘armasi taʼsischi davlatlari rahbarlarining yig‘ilishi bo‘lib o‘tadi.
Shuningdek, O‘zbekiston prezidenti ikki tomonlama muzokaralar o‘tkazishi va boshqa tadbirlarda ishtirok etishi ko‘zda tutilgan.
Kuni kecha prezident matbuot kotibi Sherzod Asadov davlat rahbari keyingi haftada AQSHga borishini ma’lum qilgandi. Shavkat Mirziyoyev Nyu-Yorkda BMT Bosh assambleyasining 78-sessiyasi umumsiyosiy munozaralarida nutq so‘zlaydi.
Eslatib o‘tamiz, Markaziy Osiyo davlat rahbarlarining maslahat uchrashuvlarini muntazam o‘tkazish tashabbusi O‘zbekiston prezidenti Shavkat Mirziyoyev tomonidan 2017-yil sentabr oyida BMT Bosh Assambleyasining 72-sessiyasida ilgari surilgan edi. Bunday birinchi yig‘ilish 2018-yil mart oyida Qozog‘iston poytaxtida, ikkinchisi esa 2019-yil noyabrda Toshkentda o‘tkazilgan va o‘shanda uchinchi uchrashuvni Bishkekda o‘tkazishga qaror qilingandi.
Izoh (0)