Қашқадарё вилоятининг Яккабоғ туманидаги мактабда ўқувчиларга синфхонада жой етишмаслиги, битта партада уч нафар ўқувчи ўтиргани айтилган видеолар тарқалди. Вилоят Мактабгача ва мактаб таълими бошқармаси ушбу ҳолатга муносабат билдирди.
Бошқарманинг ёзишича, Яккабоғ туманидаги 4-умумий ўрта таълим мактаби 2023/2024-ўқув йилида 1-синфга 89 нафар ўқувчини қабул қилган.
Мактабдаги бошланғич синфлар ўқийдиган ҳар бир синфхонада 30 нафар ўқувчи бор. Шу ҳисобдан 2023/2024-ўқув йилида 1-синфга келадиган 89 нафар болалар 3 та синфга бўлиб ўқитилмоқда. Бугунги кунда ота-оналарнинг истаги билан 9 нафар ўқувчи таълим олиш жараёнини бошқа мактабда давом эттирмоқда.
80 нафари эса шу мактабда таълим олади. Мактаб синфхоналари лойиҳа асосида 30 нафарга мўлжалланганлиги сабабли 80 нафар ўқувчилар учун тўртинчи синфни очиш талаб этилмайди, — дейилади бошқарма ахборотида.
Таъкидланишича, мактабда 850 нафар ўқувчи икки смена асосида таълим олмоқда.
Ўқувчиларнинг барчасига синфхоналар ҳамда парталар етарли эканлигини маълум қиламиз, — дейди масъуллар.
Мазкур ҳолат юзасидан вилоят Мактабгача ва мактаб таълими бошқамаси бошлиғи Убайдулла Орипов ҳам тушунтириш берди.
Нафақат бу мактабда, Яккабоғ туманидаги мавжуд барча мактабларда синфхоналар ҳамда парталар етарли. Ҳатто керагидан ортиқ. Бу масалада ҳеч қандай муаммо бўлиши мумкин эмас. Ҳал этилади, — деган бошқарма бошлиғи.
Тармоқларда тарқалган видеода ота-оналарнинг мактаб директори — Элбек Алимардонов билан суҳбати акс этган бўлиб, улар ўқувчиларнинг уч нафардан ўтиришидан норози бўлиши ва мактаб директоридан бу ҳолат қачон бартараф этилишини сўраши кўринган. Мактаб раҳбари суҳбатдош уларнинг суҳбатини телефонга тасвирга олаётгани учун саволларга жавоб қайтармай, мулоқот жойини тарк этган.
Изоҳ (0)