Namangan viloyati Uchqo‘rg‘on tumanlararo iqtisodiy sudining hal qiluv qarori bilan “NamXU OTM” masʼuliyati cheklangan jamiyatiga berilgan litsenziya berkor qilindi. Bu haqda Oliy ta’lim, fan va innovatsiyalar vazirligi ma’lum qildi.
Qayd etilishicha, sud majlisi muhokamalarida oliy taʼlim tashkiloti faoliyatida aniqlangan qo‘pol qoidabuzarliklar asosli hujjatlar bilan sudga taqdim etilib, o‘z isbotini topgan.
Oliy taʼlim, fan va innovatsiyalar vazirligining 2023-yil 10-maydagi buyrug‘iga muvofiq tekshiruv o‘tkazilib, unga ko‘ra universitet tomonidan taʼlim tashkiloti, taʼlim oluvchilar va pedagog xodimlar to‘g‘risidagi maʼlumotlar vazirlikning HEMIS axborot tizimiga kiritilmagani aniqlangan.
Shuningdek, tashkilotda rektor maslahatchisi shtati birligi joriy etilmagani, talabalarning o‘qishni ko‘chirish, qayta tiklash va o‘qishdan chetlashtirish tartibi ishlab chiqilmagani, barcha taʼlim yo‘nalishlari bo‘yicha adabiyotlar, shu jumladan, 95 foiz adabiyotlarning elektron variantlari yetishmasligi, universitet o‘qituvchilarining 23 nafari ilmiy darajaga ega professor-o‘qituvchilar hisoblansa-da, ulardan 15 nafarining asosiy ish joyi Namangan davlat universitetida ekani ma’lum bo‘lgan.
Litsenziya talabi bo‘yicha bakalavriat taʼlim yo‘nalishlari uchun 35 foiz ilmiy salohiyat belgilangan bo‘lsa-da, taʼlim tashkilotida 17 foizni tashkil etishi, ichimlik suvi va kanalizatsiya bilan taʼminlanmagani, tahsil olayotgan 858 nafar talabaga nisbatan taʼlim tashkilotining hududi yetishmasligi kabi holatlar aniqlangan.
Shu munosabat bilan 2023-yil 10-fevralda nodavlat taʼlim xizmatlarini ko‘rsatish faoliyati uchun berilgan 062797-sonli litsenziyasi bekor qilingan.
Iyul oxirlarida Farg‘ona viloyatidagi Valley innovative university MCHJga nodavlat taʼlim xizmatlarini ko‘rsatish faoliyati uchun berilgan litsenziyasi bekor qilingandi.
Izoh (0)