O‘zbekistonda davlat boshqaruvida sifat va samaradorlikni yanada oshirish masalasida BAA bilan hamkorlik kengaytiriladi. Bu haqda Prezident huzuridagi Davlat xizmatini rivojlantirish agentligi xabar berdi.
Maʼlumki, Prezident huzuridagi Strategik islohotlar va Davlat xizmatini rivojlantirish agentliklari Birlashgan Arab Amirliklari bosh vaziri ofisi bilan hamkorlikda “Government Quality Award — O‘zbekiston Respublikasi davlat organlari samaradorligi mukofoti” dasturini amalga oshirmoqda.
Dastur — mamlakatda davlat boshqaruvi va davlat xizmati samaradorligini baholashga yo‘naltirilgan loyiha hisoblanadi. Joriy yilda eng yaxshi ko‘rsatkichlarni qayd qilgan davlat tashkilotlari va davlat xizmatchilari bir necha nominatsiya bo‘yicha mukofotlanishi nazarda tutilgan.
23-avgust kuni tashkil etilgan uchrashuvda Government Quality Award dasturi doirasida amalga oshirilgan ishlarning natijalari muhokama qilindi.
Ushbu dasturda 17 ta vazirlik ishtirok etayotgan bo‘lib, Prezident huzuridagi Davlat boshqaruvi akademiyasida tashkil etilgan intervyu bosqichida nomzodlarni jami 10 ta kategoriya bo‘yicha baholash ishlari yakunlandi.
Tadbirda Davlat xizmatini rivojlantirish agentligi direktorining birinchi o‘rinbosari Otabek Xasanov ham ishtirok etib, BAA bilan davlat boshqaruvi tizimida hamkorlikni yanada kengaytirish maqsadli ekanligini taʼkidladi.
Tomonlar kelajakda O‘zbekistonda assessorlarni tayyorlab borish, davlat boshqaruvida sifat va samaradorlikni taʼminlashga qaratilgan ilg‘or yondashuvlarni joriy qilish yuzasidan kelishib oldi.
Izoh (0)