Qashqadaryo viloyatining Shahrisabz shahrida yashovchi 7 oylik chaqaloq sirka kislotasi ichirilishi oqibatida og‘ir ahvolda shifoxonaga olib kelindi. Bu haqda viloyat sog‘liqni saqlash boshqarmasi xabar berdi.
Ma’lum bo‘lishicha, chaqaloqning ota-onasi va yaqinlari bemorga ko‘rsatilayotgan tibbiy yordamdan norozi bo‘lib, ijtimoiy tarmoqlar orqali chiqish qilgan.
Shahrisabzlik 2023-yil 7-fevralda tug‘ilgan bemor I.X. Respublika shoshilinch tez tibbiy yordam ilmiy markazi Qashqadaryo filiali reanimatsiya bo‘limiga 2023-yil 9-sentabr kuni soat 15:32 da og‘ir ahvolda olib kelingan. Ota-onasining so‘zlariga ko‘ra, shu kuni soat 12:00 lar atrofida nazoratsizlik va ehtiyotsizlik oqibatida go‘dakka suvda eritilmagan yuqori konsentratsiyali sirka kislotasi ichirilgan. Oqibatda ahvoli og‘irlashgan go‘dak dastlab Shahrisabz tumani tibbiyot birlashmasi bolalar shifoxonasiga keltirilgan. So‘ng filialga yuborilgan, — deyiladi videomurojaatga javob qilgan boshqarma axborotida.
Ta’kidlanishicha, shifoxonada bemorga sirka kislotasidan o‘tkir zaharlanish, og‘iz bo‘shlig‘i, lablari, halqum, hiqildoq va qizilo‘ngach shilliq qavatlarining 1–2-darajali kimyoviy kuyishi, toksik nefrit, toksik miokardit, toksik pnevmoniya tashxisi qo‘yilib, reanimatsiya bo‘limiga yotqizilgan va standart bo‘yicha intensiv davo muolajalari bajarilmoqda.
Kasallikning ikkinchi sutkasida yuqori nafas yo‘llari kuyishi natijasida yuqori nafas yo‘llari stenozi va shishi rivojlanib, bemorda nafas yetishmovchiligi uchinchi darajasi va yurak qon-tomir yetishmovchiligi natijasida to‘satdan yurak to‘xtashi kuzatildi. Intensiv reanimatsion choralar ko‘rilganidan so‘ng yurak urishi tiklandi va bemor sun’iy nafas apparatiga o‘tkazildi. Bemorda standart asosida to‘liq reanimatsion chora-tadbirlar davom ettirilmoqda, — deyiladi mas’ullar axborotida.
Bildirilishicha, tarmoqlarda tarqalgan videomurojaatda bemorga tibbiy xizmat ko‘rsatgan shifokorlar sha’niga “superkontrakt”da o‘qigan qabilida ayblovlar yog‘dirilgan.
Vaholanki, ular ko‘p yillik tajribaga ega bo‘lgan, oliy toifali vrachlar hisoblanadi. Lor-shifokor sanitar aviatsiya yo‘nalishi orqali olib kelingan, go‘dakning ahvoli og‘irligi sababli u to‘g‘ridan to‘g‘ri reanimatsiya bo‘limiga kelib, formasiz bo‘lsa ham shoshilinch yordam ko‘rsatishni lozim deb topgan. Shundan so‘ng toksikolog, reanimatolog, kombustiolog, bolalar xirurgi va boshqa mutaxassislar ishtirokida konsilium o‘tkazilgan. Respublika shoshilinch tibbiy yordam ilmiy markazi mutaxassislaridan telemeditsina orqali tegishli tavsiyalar olinmoqda. Ijtimoiy tarmoqlarda videomurojaat bilan chiqayotgan bemorning yaqinlaridan vaziyat nechog‘lik murakkab bo‘lmasin, ehtirosga berilmasdan, holatni to‘g‘ri baholashlari va qonun doirasida ish tutishlari so‘raladi, — deydi mas’ullar.
Qo‘shimcha qilinishicha, 7 oylik chaqaloq uchun ushbu holat o‘ta og‘ir hisoblanadi. Bola organizmi hali bunday jarohatni ko‘tarishi qiyin. Bemor tana haroratining ko‘tarilishi toksik pnevmoniya bilan bog‘liq. Hozirda vaziyat viloyat sog‘liqni saqlash boshqarmasi nazoratiga olingan, go‘dakning ahvoli kasallikni kechishi, yuzaga kelgan asoratlar sababli og‘irligicha qolmoqda.
Izoh (0)